Митинг на СДСМ во Штип

фото: ТВ Телма

СДСМ на синоќешниот митинг „Крени го гласот“ во Штип го промовираше кандидатот за градоначалник Здравко Коцев

СДСМ на синоќешниот митинг „Крени го гласот“ во Штип го промовираше кандидатот за градоначалник Здравко Коцев.

Лидерот на СДСМ Бранко Црвенковски на митингот му реплицираше на премиерот Груевски за завчерашната изјава дека ќе му било тешко во Штип.

- Ако нешто ми беше тешко, ми беше тешко патувањето по патот од Велес до Штип, кој пред секои избори го ветувате, а по нив го заборавате. Ми беше тешко и да поминам низ гужвата од новиот аеродром кај Врсаково, зашто се е ветар и магла, рече Црвенковски.

Тој додаде дека отпуштањата на работниците и создавање на стечајците од поранешните гиганти „Македонка“, „Астибо“, „Алумина“ и ЗИК „Црвена Ѕвезда“ е токму поради како што рече потписот на актуелниот премиер во 2002 година.

- Никој во името на СДСМ не бил против отварањето на универзитетот. Никој во името на СДСМ не се откажал од македонскиот национален индентитет, рече Црвенковски.

Лидерот на СДСМ на забележа дека во источна Македонија најтешко се живее, има голема сиромаштија и наталитетот е најнизок. Но, како што наведе, „во источна Македонија има најмногу покер апарти, лихвари и сетоа тоа со благослов на Владата“.

Кандидатот за градоначалник на СДСМ Здравко Коцев во своето обраќање пред штипјани рече дека актуелната власт ветувала карго аеродром, затворен базен, студентски град, автопат и тунел, кој ќе го спои центарот на градот со крстосницата „Дујле“, но ништо не е реализирано.

- Што ќе сум понудел, јас ја барам подршката од вас со чист образ. Не делам празни ветувања, ќе изградам мост на реката Брегалница кој ќе ги поврзе населбите „Сењак„ и „Автокоманда“ со индустрискиот дел на градот, ќе го гасифицираме Штип, а за најмалите ќе ја отвориме и првата Зоолошка градина во источна Македонија, рече Коцев.

Тој се осврна на работата на градоначалникот на Општина Штип, Зоран Алексов и забележа дека кредитот кој е земен за проектот за уредување на коритото на реката Отиња и изградбата на платформите за паркирање на возилата е на штета на штипјани, кои ќе мора да го враќаат заемот.

Наредниот викенд раководството на СДСМ ќе биде во Куманово.