Забава и велосипедизам во Маврово

Викендов се одржува традиционалната велосипедска Маврово тура

Викендов се одржува традиционалната велосипедска Маврово тура, во организација на Националниот парк Маврово, општините Маврово и Ростуше и Амбасадата на Кралството Холандија.

Сите собрани средства ќе бидат наменети за хуманитарната акција за изградба на ургентен центар на Универзитетската клиника за детски болести. Покрај традиционалната рекреативна тура околу Мавровското езеро ќе бидат организирани и маратон и полумаратон во планински велосипедизам, како и многу придружни активности за сите возрасти. Во рамките на културната програма чиј водител е Сузана Турунџиева ќе настапат Александар Белов,

Александра Пилева и културни друштва од мавровскиот регион. Ќе биде организирана и лотарија со богати подароци – викенди за двајца, планинарска опрема, велосипед и вредносни купони.Учеството во настанот е бесплатно, со исклучок на маратонот и полумаратонот. Организаторите обезбедија повратен автобуски превоз од Скопје до Маврово по симболични цени (150 денари за автобуски билет и 50 денари за превоз на велосипед).

Маврово турата е традиционален рекреативен настан кој се одржува секоја година во јуни. Првиот настан се одржа во 2009 година со цел да се промовираат природните убавини на националниот парк Маврово, особено Мавровското езеро и околината, и да им се овозможи на вљубениците во велосипедизмот и природните убавини да поминат убав ден во природа.