Изгласана одлуката за преименување на улиците во Скопје

На Седницата во Собранието на Град Скопје, која по инцидентите продолжи без советниците од опозицијата, одлуката сепак беше изгласана

Советот на Град Скопје ja изгласа одлуката за промена на имињата на улиците во главниот град предложена од ВМРО-ДПМНЕ, без присуство на советниците од опозицијата кои ја напуштија седницата откако не беше прифатен нивниот предлог да биде симната оваа точка од дневен ред на денешната седница. Одлуката беше причина и за протест на група граѓани, жители од Скопје кои беа против ставањето на Одлуката на дневен ред и промена на имињата на улиците. За време на протестот групата се обиде да влезе во Градското собрание во што беше спречена, а притоа беа искршени стаклата на влезната врата.

Според советникот од ВМРО-ДПМНЕ Александар Бичиклиски ова е крајно вандалски чин и крајно нецивилизиран што ја покажува ниската политичка култура на СДСМ. - Беа повикани нивни членови и целата пратеничка група која што со овој потег покажува дека или СДСМ не и верува на својата советничка група во Советот или немаат капацитет па затоа ги повикаа, изјави Бичиклиски.

Советничката од СДСМ Софија Куновска оцени дека ова е криминал и историски геноцид и додаде дека ја напуштаат седницата бидејќи не сакаат да бидат соучесници во понижувањето на сопствената македонска историја.

- ВМРО ДПМНЕ на подмолен начин сака да го избрише ликот и делото на оние кои ги дале своите животи за нашата држава, изјави Куновска.