Француските социјалисти освоија апсолутно мнозинство

Сеголен Ројал

Претседателот Франсоа Оланд сега ќе може да ги спроведе своите реформи, а ќе располага и со мнозинство во Конгресот

Француските социјалисти освоија апсолутно мнозинство во Француското националано собрание на денешниот втор круг од парламентраните избори, јавува дописникот на МИА од Париз.

Според првичните резултати објавени на француската државна телевизија Франс 2, Социјалистичката партија освои 291 од вкупно 577 пратенички места. Сојузниците на социјалистите, Зелените освоија 20 пратенички места, радикалната лева партија 12 мандати и движењето на грѓаните 5 мандати, со што блокот на левицата во новиот состав на Долниот дом на францускиот парламент ќе располага со 341 пратеничко место.

Центарот МоДем освои само 2 пратенички места, досегашната владејачка УМП со 212 пратенички места е најголемата опозициска партија, Новиот центар има 15 пратенички места, 4 се на други партии од десницата, додека крајно десниот национален фронт, според досегашните резултати може да се надева на 2 до 4 пратеници.

Ова се неофицијални резултати, официјалните ќе бидат познати во текот на ноќта.

Победа на социјалистите и левицата на парламентарните избори, дозволи за првпат во историјата на Франција, во двата дома на францускиот парламент- Сенатот и Националното Собрание да биде мнозинска левицата и истовремено на чело на државата да има и свој претседател – социјалист.

Во моментов и 21 од 22 француски региони се во рацете на левицата, освен Алзас кој традиционално гласа за десницата.

Претседателот Франсоа Оланд сега ќе може да ги спроведе своите реформи, а ќе располага и со мнозинство во Конгресот (заедничко заседание на Националното Собрание и Сенатот) што ќе му дозволи да го промени и францускиот Устав.

Според првите резултати, во новоиот состав на Француското национално собрание нема да заседаваат Сеголен Ројал, која беше поразена во ла Рошел од еден друг социјалист – дисидент, ниту пак претседателката на Националниот Фронт Марин Ле Пен, меѓу поразените кандидати е и лидерот на центарот Франсоа Бајру, кој го загуби и последниот национален мандат.