Нова власт - стари рампи за името

Хајнц-Јирген Акст е скептичен дека ЕУ би презела иницијатива за надминување на стагнацијата во разговорите

Стагнацијата во разговорите меѓу Македонија и Грција околу името ќе потрае, оценува во изјава за Дојче веле Хајнц-Јирген Акст, добар познавач на Балканот и професор на катедрата Жан Моне на Универзитетот Дуизбург - Есен. Тој е скептичен дека ЕУ би презела иницијатива за надминување на стагнацијата во разговорите.

Победата на Нова демократија на Андонис Самарас можеби ќе го спречи пропаѓањето на еврото, но во никој случај нема да донесе надминување на дводеценискиот спор околу името меѓу Македонија и Грција. Напротив, како што смета, состојбите во регионот, во ситуацијата во којашто се наоѓа Грција, не е исклучено проблемот со името буквално да се „забетонира“.

- Сметам дека Грција е толку многу погодена од евро-кризата, што ниту една од партиите нема да изнајде можност да се занимава со надворешнополитички теми. Поради ова, мора да се смета дека и натаму ќе владее стагнација во спорот со името. До решението ќе минат години, вели Акст.

Тој не верува дека ЕУ која е преокупирана со своите проблеми би покренала иницијатива околу спорот за името.

- Стравувам дека до решението можеби ќе потраат не месеци и година, туку години! Ова е резултат на повеќе околности. Прво, Грција надворешнополитички е неспособна да делува зашто е заглибена во финансиската криза. Второ, партнерите во Европската унија и еврозоната се занимаваат речиси исклучиво само со прашањето на еврото. Трето, се’ повеќе држави, како што се слуша сега и Кипар, ќе бараат закрила под чадорот на еврото. Во целава оваа ситуација, многу сум скептичен дека од страна на Европската унија би дошла иницијатива која би била неопходна за да се надмине стагнацијата во преговорите меѓу Грција и Македонија, смета професор Акст.

Сепак, според него, останува можноста иницијативи да се покренат и од македонска страна, и тоа иницијативи за доверба кои би можеле да се усогласат со Европската унија.

- Не гледам, меѓутоа дека вакво нешто Македонија презема. Македонија не мора да остане без дејствување само поради тоа што Грција е неспособна за преговори. Сметам дека секој политичар во Скопје треба да е начисто дека во Атина има партнер чии раце во моментов се навистина врзани, коментира за ДВ професор Хајнц-Јирген Акст.