Груевски се сретна со Путин во Санкт Петербург



Премиерот на Република Македонија Никола Груевски денеска во Санкт Петербург се сретна со претседателот на Руската Федерација Владимир Путин.

На средбата, како што соопшти владината прес-служба, соговорниците ги истакнале добрите политички односи кои владеат меѓу двете земји на севкупно ниво, кои, како што оцениле, се во нагорна линија.

- Премиерот Груевски и претседателот Путин констатираа дека двете земји успешно се справија и справуваат со последиците од глобалната економска криза, која е сериозен предизвик за сите земји од светот, се вели во соопштението.

Соговорниците изразиле заложба и поддршка за продлабочување и интензивирање на економските односи, зголемување на економската соработка на планот на инвестициите и трговската размена.

Меѓу клучните приоритети за кои се разговарало е и соработката во областа на гасификацијата и вклучувањето на Република Македонија во меѓународните коридори за пренос на гас, што, како што било оценето, ќе отвори нови перспективи за македонската економија.