Тачи блиску до пакт со Црвенковски и Георгиевски

Според лидерот на ДПА, локалните избори ќе бидат главен тест за евентуална идна соработка со партиите од македонскиот камп

Лидерот на ДПА, Мендух Тачи, изјави денеска во Тетово дека е блиску до соработка со опозициските партии од македонскиот блок.

„Многу блиску сме да се договориме за некој вид соработка. Во многу теми се согласуваме, освен за Охридскиот договор за кој сметаме дека не е добар за уредување на меѓуетничките односи. Полека работиме, се подготвуваме за локалните избори и сметаме дека тие ќе бидат главен тест за евентуална идна соработка“, рекол Тачи по средбата со амбасадорот на Косово во Македонија, Илбер Хиса, со кого разговарале за спорот со Грција за името и за блокираните евроатлантски интеграции на Македонија.

Како што пренесе МИА на новинарско прашање околу можната соработка со партии од македонскиот опозициски блок, Тачи изјавил дека има редовни контакти со лидерите на македонската опозиција, Бранко Црвенковски, Љупчо Георгиевски и други, но, како што рече, малку е покомплицирана и потешка таква коалиција.

За наредната недела се најавува средба на двајцата поранешни премиери Црвенковски и Георгиевски, во функција на разговорите за обединување на опозициските партии пред локалните избори. Со оваа средба ќе финишира првата фаза разговори на Црвенковски со претседателите на вонпарламентарните партии. Претходно, тој се сретна со Андреј Жерновски од ЛДП и со Стојанчо Ангелов од Достоинство, како и со претставници на раководството на ОМ.

Од централите на СДСМ и на ДПА доаѓаат различни информации за тоа дали досега имало неформална средба меѓу Црвенковски и Тачи. Во секој случај, за локалните избори мали се шансите за формална коалиција меѓу опозициските партии од двата политички блока. Затоа, пак, постојат реални изгледи за нивна соработка преку поддршка на кандидатите за градоначалници во етнички мешаните средини, во зависност од тоа која заедница каде е мнозинска. Прашање на договор ќе биде дали таквата соработка би се реализирала пред почетокот на изборите или меѓу двата круга гласање. (А.М.М.)