21.06.2012, 13:34 Нови инвестиции на „Лукоил” во Македонија
Премиерот Никола Груевски денеска во Санкт Петербург се сретна со директорот на руската нафтена компанија, Вагит Алекперов
„Лукоил“ планира да ја зголеми инвестицијата во Република Македонија. Ова беше тема на денешната средба на премиерот Никола Груевски, со директорот на компанијата „Лукоил“, Вагит Алекперов во Санкт Петербург каде учествува на Меѓународен економски форум.
На средбата, како што соопшти владината прес-служба, премиерот Груевски потенцираше дека Владата на Република Македонија е подготвена да даде целосна поддршка на реализација на плановите на руската компанија. Притоа премиерот Груевски истакна дека влезот на „Лукоил“ на македонскиот пазар ја подобрил конкурентноста и ги унапредил процесите од корист за потрошувачите и граѓаните.
Соговорниците изразија задоволство од досегашната соработка и посветеност за продолжување на процесите од интерес и за нашата држава и за руската компанија.
Премиерот Груевски, во рамки на посетата на Русија, денеска во Санкт Петербург ќе се сретне со рускиот претседател Владимир Путин.
Средбата ќе даде нов сигнал и насока за политичките односи меѓу двете земји, но и за економските односи меѓу двете земји во следните години. Таа е уште една потврда дека Република Македонија во Русија е примена на највисоко ниво и дека има извонредно отворена врата за развој на политичките, но пред се и за економските односи.
Премиерот Груевски ќе присуствува и на отворањето на престижниот и реномиран Меѓународен економски форум на Санкт Петербург, како и на заеднички ручек со шефови на држави и влади кој го организира рускиот претседател Путин. На овој престижен форум, традиционално учествуваат реномирани економски експерти, аналитичари, бизнисмени и политичари.
Владината делегација предводена од премиерот Груевски ќе присуствува и ќе се обрати на бизнис форум за презентација на инвестициските можности и поволности кои Република Македонија ги нуди на странските инвеститори. При престојот во Санкт Петербург, премиерот Груевски ќе го отвори и почесниот конзулат на Република Македонија во Руската Федерација.
Минатите денови владиниот тим оствари посета на повеќе руски градови каде беа одржани бизнис форуми за презентирање на македонските поволности за инвестирање, а во рамки на посетата на Руската Федерација, Груевски оствари средби и со губернатори на повеќе области.
Македонската делегација ја почна посетата на Руската Федерација во Москва каде можностите за инвестирање во Македонија беа презентирани пред околу стотина руски инвеститори, а беше потпишан и договор за соработка меѓу Република Македонија и Московската област.
|
