Самарас на чело на новата грчка влада

Адонис Самарас е новиот грчки премиер, а Грција до крајот на денот ќе го знае и составот на новата влада во која учествуваат десничарската Нова демократија, социјалистите ПАСОК и Демократска левица.

Од нашиот дописник
Миркица Поповиќ

Адонис Самарас е новиот грчки премиер, а Грција до крајот на денот ќе го знае и составот на новата влада во која учествуваат десничарската Нова демократија, социјалистите ПАСОК и Демократска левица. По положувањето на заклетвата, новиот грчки премиер Самарас истакна дека од новата влада ќе побара многу работа за да може да му се влее надеж на народот.

"Патриотизам, силно национално едиство и доверба. Со Божја помош ќе направиме се од себе за нашиот народ што побрзо да излезе од кризата", истакна Самарас на излегувањето од претседателската палата. По положената заклетва Самарас замина во премиерската палата за да ја преземе функцијата од преодниот премиер Панајотис Пикраменос. Пикраменос честитајќи му посочи дека го чека тешка работа и внатре во земјата, но и надвор со меѓународните партнери. Премиерот кој овој месец ја водеше грчката влада му порача на Самарас да се погрижи да почнат да функционираат основните столбови на општеството како образованието, здравството, безбедноста и енергетскиот сектор, како и да се погрижи Грција да ја добие повторно позицијата која ја заслужува во Грција.

Новата влада се очекува да положи заклетва утре. Во новиот состав се најавува дека ќе има 16 министри и 12 заменици министри. Се уште се шпекулира со имињата на новите министри. Речиси сигурно е името на новиот министер за финансии кој во моментов и е најважен на Грција. За ова место се коментира дека се спрема професорот Василис Рапанос. Овој сектор ќе биде и првиот предизвик на Грција, која утре треба да испрати свој претставник на состанокот на Еврогрупата. Како што најави лидерот на ПАСОК, Евагелос Венизелос на состанокот со овластување од новиот премиер ќе оди министерот за финансии во Заминување, Јоргос Зањас.

За министерството за надворешни се шпекулираше со имињата на Димитрис Аврамопулос, заменик-претседател во Нова демократија и поранешен министер за одбрана, и Панос Панајотопулос кој е одговорен за надворешна политка во Нова демократија.

ПАСОК и Демократска левица нема да учествуваат со свои пратеници во владата, туку предлагаат технократи кои се блиски до нивните политички идеологии.

Венизелос во изјавите посочи дека она што е клучно покрај одбирање на најспособните личности за новата влада е одбирање на силен националиот тим за преговарање на условите за грчкиот заем. Истакна дека Нова демократија, ПАСОК и Демократска левица ја презем��ат одговорноста да формираат влада и со тоа да преземат обврска да преговараат за менување на условите на доворот за заем. Изрази жалење што СИРИЗА и Алексис Ципрас одбиле да учествуваат во тимот за преговарање, што според него е прашање од државно значење. Првиот предизвик за Грција и овој тим за преговарање ќе биде самитот на ЕУ на 28 и 29 јуни, каде владата ќе ја почне битката со европските партнери за измена на условите и покрај изјавата на претседателот на Еврогрупата, Жан Клод Јункер дека нема простор за преговарање на условите.