21.06.2012, 13:52 Граѓаните го запоседнаа Градскиот парк за „Види музика, слушни слика...“
Публиката танцуваше и ги потпевнуваше познатите рефрени, а на крајот со громогласни аплаузи го поздрави настапот на филхармоничарите
Класичната рокенрол постава од гитара, бас, тапани и вокал, вчера беше заменета со куп гудачи и дувачи кои им дадоа симфониски манири на популарните песни од „Ролинг Стоунс“, „Полис“, „Лед Цепелин“, „Пинк Флојд“, „Квин“, Тина Тарнер, Ерик Клептон, Мајкл Џексон...
Петтото издание на мултимедијалниот настан „Види музика, слушни слика, добиј книга“ собра неколку илјадници посетители - намерници, но и случајници, на тревникот во првиот дел во Градскиот парк каде што Македонската филхармонија под диригентство на британецот Тимоти Редмонд, ги свиреше познатите теми „Layla“, „Triler“, „Pride“, „Another birck in the wall“, „Ange“, „We are the Champions“, „Every Breath you take“, „Imagine“, македонските „Сонце за три света“, „Сите мои слики“...
Различни генерации, различни профили на луѓе, баби и дедовци со внуци, мајки и татковци, млади и стари, го запоседнаа зеленилото на Градскиот парк сите подеднакво уживајќи во звуците на популарните нумери кои ги одбележаа 80-тите и 90-тите музички години. Публиката танцуваше и ги потпевнуваше познатите рефрени, а на крајот со громогласни аплаузи го поздрави настапот на филхармоничарите и диригентот кој и самиот танцуваше водејќи го оркестарот, а кој настанот го најави на македонски јазик со симпатичен британски акцент. Оркестарот беше збогатен и со четиричлениот бенд на сцената, членови на Филхармонијата и Македонската опера - Александар Поп-Христов на гитара, Иван Бејков на бас, Гоце Стефковски на тапани и Емин Џијан на клавијатури.
Концертот „Рок симфони“, што веќе одамна е познат концепт во светот, симфониските оркестри да се инволвираат и во другите музички жанрови со цел да се популаризира оркестарската музика, беше збогатен со уште два придружни настани. Традиционално и годинава, на две големи платна, инспирирани од звуците на Филхармонијата своите мотиви ги сликаа ликовните уметници Горјан Георгиев и Невзат Бејтули-Кица. Додека редиците кои се создаваа пред штандот за книги, овој пат беа за бесплатните примероци од книгата „Снег“ на Максанс Фермин. (Т.И.)
|
