Во Македонија лани работеле 66 телевизии и 69 радио станици

Во Македонија минатата година со радиодифузна дејност се занимавале 135 радиодифузери, од кои 69 емитуваат радиопрограма, а 66 телевизиска програма, соопшти Државниот завод за статистика. Од радиодифузерите кои емитуваат радиопрограма, едно е јавно радиодифузно претпријатие, 66 се трговски радиодифузни друштва и две се непрофитни радиодифузни установи.

Јавното радиодифузно претпријатие емитувало вкупно 37.430 часови, од кои најголем дел или 61,3% се музичка програма. Трговските радиодифузни друштва кои емитуваат радиопрограма емитувале вкупно 499.090 часови радиопрограма, од кои најголем дел или 59,5%, исто така, се музичка програма. Од радиодифузерите кои емитуваат телевизиска програма, едно е јавно радиодифузно претпријатие, а 65 се трговски радиодифузни друштва.

Јавното радиодифузно претпријатија емитувало вкупно 21.010 часови телевизиска програма, од која најголем дел или 14,7% се играна програма. Трговските радиодифузни друштва емитувале вкупно 484.041 часови телевизиска програма, од која најголем дел или 26,2% се играна програма.