Иванов очекува Грција одговорно да се однесува кон обврските

Со внимание го следиме сето она што се случува во Грција, знаеме дека завршија изборите и ги знаме резултатите, вели претседателот

Со внимание го следиме сето она што се случува во Грција, знаеме дека завршија изборите и ги знаме резултатите. Очекуваме тоа што сите очекуваат од Грција, односно одговорно да се однесува кон преземените обврски.

Ова денеска го изјави претседателот Ѓорге Иванов по пуштањето во употреба на „Паркот на езерата“ во општина Аеродром, одговарајќи на новинарско прашање како ги коментира изборните резултати од Грција и дали сега има простор за разговори околу спорот за името.

- Грција има обврски и кон нас со Времената спогодба, со рамката која е во Обединетите нации, па и со пресудата од Меѓународниот суд во Хаг. Доколку одговорно се однесува постои можност да се дојде до решение. Доколку не се однесува одговорно, повторно ќе се одлага процесот и ќе се бараат изговори, рече Иванов.

Коментирајќи дали очекува одговорно однесување од Андонис Самарас, лидерот на Нова демократија која победи на изборите во Грција, шефот на македонската државата нагласи дека имајќи ја предвид неговата биографија и што се правел во животот и политиката, во иднина се е можно.