Уште потопло време до недела

Во Македонија денеска 38, утре и задутре 39 степени, во сабота и недела благ пад на температурата

Македонија неделава е под влијание на многу топла и сува воздушна маса од северна Африка, што условува сончево и многу топло време, со висок УВ индекс.

Според најавите од УХМР, температура денеска ќе достигне до 38 степени, а максимумот ќе биде утре и в петок кога се очекуваат 39 Целзиусови степени.

Во наредните два дена ќе има и висок УВ-индекс со вредност 9.

Благо опаѓање на температурата се очекува во сабота кон крајот на денот, во недела и во понеделник кога ќе има нестабилност со локален пороен дожд и грмежи. Температурата ќе се движи од 29 до 37 степени.

Утре рано изутрина во 1 часот и 9 минути календарски почнува летото. Во исто време за жителите на јужната хемисфера почнува зимата.

На почетокот на летото, денот е најдолг, а ноќта најкратка. Сонцето во Скопје ќе изгрее во 4 часот и 58 минути, а ќе зајде во 20 часот и 12 минути. Денот ќе трае 15 часа и 14 минути, а ноќта само 8 часа и 46 минути.