Сеул ќе ја собори севернокорејската ракета

Јужна Кореа во воздух ќе ја уништи севернокорејската ракета, доколку сврти кон јужнокорејска територија по истрелувањето, предвидено за средината на април, денеска соопшти јужнокорејското Министерство за одбрана, цитирано од светските агенции.

-Подготвуваме средства за следење на траекторијата на ракетата и ќе ја собориме, доколку таа сврти од предвидениот пат, за да падне на наша територија, подвлече портпаролот на министерството.

Јужна Кореа и САД внимателно ја набљудуваат базата, од која ќе биде истрелана ракетата во северозападниот дел на Северна Кореа.

Се очекува истрелувањето на ракетата да се случи меѓу 12 и 16 април.

Пјонгјанг тврди дека ракетата со сателит ќе ја изведе во орбитата.

Според јужнокорејското воено разузнавање, подготовката за истрелувањето напредува и голем дел од елементите викендов биле доставени до местото од кое ќе се истрела ракетата.

Сеул стравува дека првиот степен на ракетата, што треба да падне во Жолто море, меѓу Јужна Кореа и Кина, може да падне на јужнокорејска територија.

Јапонија, исто така, стравува од перспективата ракетата или делови од неа да паднат на јапонска територија и предупреди дека ќе ги активира своите системи за противракетна одбрана. Минатата недела премиерот Јошихико Нода даде наредба да се уништи ракетата, доколку таа и се закани на територијата на Јапонија.