Поглед

Катар по втор пат

Нина Нинеска-Фиданоска

Готово е. Спасени сме. Нема веќе сиромаштија, нема веќе безработица. Само што не почнале да се слеваат инвестициите од Катар, кои начелно беа договорени лани во октомвр�� на наша територија, а сега премиерот Никола Груевски и вицепремиерот Зоран Ставрески „тркнаа“ дотаму за да ги потврдат. Катарците, кои разговараат во милијарди, овде сигурно ќе вложат барем силни милиони.

Ваков впечаток сосема извесно добива новинарот што овие два дена се обиде да ги следи владините извештаи од Катар, каде што замина македонската делегација, како уште една во низата егзотични локации за претставување на нашите одлични можности за инвестирање. Човек кога ги слуша изјавите на Груевски и Ставрески за тоа со какви се' значајни инвеститори се сретнале, што се' им било презентирано и колку голем интерес тие искажале за македонските големи потенцијали, не може а да не помисли дека дошол крајот на нашите проблеми од економски карактер. Владината прес-служба и државните агенции овие два дена, се чини, едвај постигнаа да ги доиспратат сите можни изјави и информации за тоа во колку многу дејности има изгледи да се вложат катарските пари. Охридско, Преспанско и Дојранско Езеро ќе станат мегатуристички центри, ќе се изградат патишта, енергетски објекти, ќе се откупат сите наши јагниња, и не само тоа, туку и многу други земјоделски производи. Дури и водата наша ќе патува во таа далечна дестинација - дали во шишиња или, пак, катарските инвеститори ќе купат извори на пивка вода во земјава и ќе ги експлоатираат, сеедно, битно е дека имало голема желба, која беше пренесена уште за време на нивната октомвриска посета.

А да се вратевме малку во реалноста? Па да се надеваме на некоја поскромна, ама остварлива катарска инвестиција. Како и да е, велат дека за посета на Катар е најубав токму овој период од годината.