Прекршочни пријави за професорите од Хемиското училиште

Пријавите се поднесени од полицијата за физички напад, а многу е веројатно дека ќе следуваат дополнителни санкции од училиштето

Двајцата професори од Државното средно хемиско училиште „Марија Кири-Склодовска“, кои беа инволвирани во завчерашниот инцидент, ќе се гонат со прекршочни пријави. Како што потврдуваат од Министерството за внатрешни работи, за професорите Ј.Б.(29) и Б..Х.(25) веќе се поднесени пријави за сторен физички напад.

Какви мерки ќе преземе раководството на училиштето засега е неизвесно бидејќи, како што велат оттаму, тие ќе причекаат на службеното известување на полицијата, па дури потоа ќе решаваат какви санкции ќе бидат преземени.

„Се' додека не го добиеме полицискиот извештај нема да бидат преземани никакви чекори. Доколку навистина се потврди дека за двајцата професори ќе бидат поднесени прекршочни пријави, тогаш ќе одлучиме што ќе правиме. Ние во училиштето имаме кодекс на однесување, кој не важи само за учениците туку и за наставниот кадар, што, пак, значи дека кодексот треба сите да го почитуваат“, вели Павле Павлов, директор на средното хемиско училиште „Марија Кири-Склодовска“. Тој појаснува дека токму професорите по хемија и англиски јазик имаат договори кои се на сила заклучно со 31 август оваа година.

Најновниот инцидент во средното хемиско училиште, всушност, претставуваше инцидент во низа. Имено, се' почнало кога еден ученик од втора година удрил по рамо една година помлада соученичка. За ударите девојчето го информирало професорот по хемија Б.Х., кој нападнал еден од учениците. Го спасило обезбедувањето на училиштето. Потоа следел уште еден инцидент, кога професорот по англиски јазик нападнал друг ученик и го турнал по скалите. (Љ.С.)