Овации за Фишер во „Стејплс центар“, Оклахома ги доби лејкерси

Дерек Фишер на паркетот мина 16 минути и учествуваше со седум поени во триумфот на Оклахома над „езерџиите“ со 102:93

Дерек Фишер беше дочекан со овации од публиката во неговото прво враќање во „Стејплс центар“ по долгогодишната соработка со тимот на Лос Анџелес Лејкерс. Во игра влезе од клупата, на паркетот мина 16 минути и учествуваше со седум поени во триумфот на Оклахома над „езерџиите“ со 102:93. Најзаслужни во петтата победа на тандерси, според очекувањата, беа Расел Вестбрук и Кевин Дурант кои комбинирано уфрлија 57 коша, но екипата за првпат по четири натпревари падна под 50 отсто успешност при ударите од поле. Прв стрелец во домашниот состав беше Ендрју Бинам со 25 коша и 13 скока, Коби Брајант постигна 23.

Екипата на Мајами, пак, ја прослави 15. победа на домашен терен. „Жешките“ беа убедливи против Далас со 106:85 во реприза на минатогодишното финале во НБА-лигата. Дури шест играчи во победничкиот состав завршија со двоцифрен број уфрлени поени. По 19 дадоа Крис Бош и Леброн Џејмс, по 16 впишаа Двејн Вејд и Удонис Хаслем. Мајами го обезбеди 36. сезонски триумф во последниот период од средбата што го доби со 26:13. Лидер на маверикси беше Дирк Новицки со 25 поени, 12 додаде Ламар Одом, по 11 уфрлија Винс Картер и Брендон Рајт.

Резултати: Лос Анџелес Лејкерс - Оклахома 93:102, Мајами - Далас 106:85, Портланд - Њу Орлеанс 99:93, Индијана - Вашингтон 93:89.