Карлос Слим ќе го види Музејот на ВМРО

Слим утре ја почнува својата тридневна посета на Македонија, а ќе престојува во Скопје и во Охрид

Сања Наумовска
Веле Митаноски

Најбогатиот човек на светот, мексиканскиот милијардер Карлос Слим, во својата тридневна посета на Македо��ија ќе го прошета Музејот на ВМРО, а се очекува да го посети и Плаошник и уште неколку културно-историски знаменитости на Охрид.

Слим утре ја почнува својата тридневна посета на Македонија, а ќе престојува во Скопје каде што ќе се сретне со премиерот Никола Груевски и во Охрид, каде што ќе претседава со Комисијата за широкопојасен интернет и дигитален развој, формирана од Меѓународната телекомуникациска заедница и УНЕСКО. Попатно, најбогатиот човек на светот треба да ги разгледа и убавините на нашата земја, а можно е да го посети и Музејот на ВМРО, бидејќи како голем љубител на музеи, и самиот поседува еден. Слим се' уште не ја потврдил, ниту ја одбил агендата која му ја понудиле македонските домаќини и во која се предвидуваат повеќе прошетки низ Скопје и Охрид. Доколку му дозволат обврските на Конференцијата, Слим би требало да го посети и Плаошник и уште некои културно-историски знаменитости на Охрид, пред да си замине на 2 април. За време на целиот престој во Македонија за милијардерот и неговата придружба ќе има специјален безбедносен третман во движењето на поворката до хотелот каде што ќе биде сместен, и се разбира и низ Скопје и низ Охрид.

Се очекува, Слим со својот приватен авион утре да слета на скопскиот аеродром „Александар Велики“ и да замине на најавената средба со премиерот Никола Груевски и економските министри во Скопје. Според најавите од Владата, на средбата со милијардерот ќе му се понуди соработка на повеќе значајни проекти, пред се' во енергетиката, телекомуникациите, хотелиерството и експлоатирањето минерални суровини. Министерот за информатичко општество и администрација, Иво Ивановски, на чија лична покана Слим доаѓа во Македонија, минатата недела најави дека во Владата се подготвени за сите теми да дискутираат со Слим.

„Ние веќе имаме предложено неколку проекти, кои ќе ги ставиме на маса и за кои ќе продискутираме. Се надеваме дека дел од нив ќе бидат интересни за него и за неговите компании“, рече Ивановски.

На листата, според министерот, се дел од најголемите владини капитални проекти. „На оние што ќе дојдат со Слим ќе им предложиме да ги разгледаат проектите детално. Се надеваме дека ова нема да биде прв контакт и дека по посетата ќе имаме можност повеќе да комуницираме со претставниците на неговите компании“, нагласи Ивановски.

Следните денови Слим ќе престојува во Охрид, каде што ќе биде дел од Комисијата за широкопојасен интернет и дигитален развој. Освен него, на собирот за информациски технологии, во земјава ќе дојдат и нејзиниот копретседавач - претседателот на Руанда Пол Кагаме, како и комисиските членови, меѓу кои и извршните директори на најголемите светски компании кои се двигатели на информатичкото општество, како „Интел“ „Ериксон“, „Телефоника“, „Циско“, „Алкател лусент“, „Хуавеј“ и многу други.

Според магазинот „Форбс“, Слим е најбогат човек на светот, трета година по ред, а неговото богатство е проценето на 69 милијарди долари. Тој своето богатство го стекна во секторот на телекомуникациите, трговијата, финансиите, суровините и енергетиката. Мексиканскиот бизнис-магнат и филантроп е претседател и главен извршен директор на телекомуникациските компании „Телмекс“ и „Америка Мовил“ и има огромни имоти во други мексикански компании преку својот конгломерат, „Групо Карсо САБ“, како и бизнис-интереси на друго место во светот. Седумдесет и двегодишниот Слим сега работи и во секторот на малопродажба, финансиите, суровините и енергетиката. Во последните години мексиканскиот магнат купи големи удели во странски компании како што е синџирот на стоковни куќи „Сакс“ и издавачот „Њујорк тајмс“.

Подготвен апартманот „Јуниор“ во „Инекс Горица“


Како што дознава „Утрински“, Слим ќе биде сместен во апартманот „Јуниор“ во хотелот „Инекс Горица“, каде што и се одржува конференцијата. Луѓе од неговиот тим веќе се во Охрид неколку дена. Како и тој, сместени се во „Инекс Горица“. Куриозитет е што тие не го одбрале најновиот, туку, според времето на изградбата, најстариот блок од хотелот, иако и тој е најсовремено уреден. Милијардерот сакал малку и да се одмори, да има посебен влез и помалку одвоен, изолиран дел. На располагање ќе му стои апартманот „Јуниор“, кој во поглед на опремата, вклучително и неповторливата визура на езерото и погледот кон Охрид, не заостанува од вкупно шесте резиденцијални, односно претседателски апартмани.

Милијардерот ќе проба македонски специјалитети, вино и охридска торта

Управителот на „Инекс Горица“, Климе Ристески, за „Утрински весник“ открива дека Карлос Слим не побарал ништо посебно и ништо поразлично од преостанатите гости. Со министерот Ивановски и премиерот Груевски ќе се дружи исто како и останатите. Ќе го јаде истото телешко мени, истата надалеку позната охридска торта, што на тој начин, традиционално се подготвува само во овој објект. Ја пробале многу крунисани глави, а на времето, велат дека токму тука се сместил и поради тортата, еден од поранешните руски патријарси, кога бил во Охрид и Македонија.

„Не доставија никакви барања, освен да бидат заедно со придружбата, во посебен блок. Ќе јадат карпачо од телешко месо, како и сите други. Веднаш по пристигнувањето в сабота навечер, гостите ги чека коктел, со македонски народни специјалитети и со најдобриот избор од македонските винарници. В недела е работниот ден, од 8,30 до 13 часот, по што следува пауза за ручек. Попладне уште една работна сесија и вечера, некаде во стариот дел на Охрид“, вели Ристески.