Ѓоковиќ: Го играм мојот најдобар тенис досега

Новак Ѓоковиќ по трет пат во кариерата го освои турнирот во Мајами, а по триумфот не криеше дека е презадоволен од својата игра

Со 2:0 во сетови 6:1 и 7:6, Ѓоковиќ во финалето го совлада Енди Мари, доаѓајќи на тој начин до титулата без ниту еден загубен сет на целиот турнир.

Дефинитивно, тоа не беше меч за паметење. И едниот и другиот имаа неспоредливо повеќе грешки отколку директни поени (Ѓоковиќ 38:19, Мари 39:16). Но, светскиот рекет број еден смета поинаку: „Играм во врвна форма. Го играм најдобриот тенис досега. Сега тоа морам да го искористам колку што можам“, прокоментира Ѓоковиќ, кој по трет пат го освојува Мајами (2007 и 2011 година).

„По овој триумф ќе имам уште поголема самодоверба. Успеав да ги одиграм најдобрите поени, точно кога беше најпотребно“, додаде српскиот тенисер, кој не почувствува замор.

„Физички бев одморен и многу подготвен. Имав доволно време да се подготвам за финалето, да соберам сила. Минатата сезона беше неверојатна, особено првите шест месеци. Секоја сезона е поинаква, но се' уште сакам да се борам за секој достапен трофеј“, додаде Ѓоковиќ, кој го освои својот 11. трофеј од серијата Мастерс 1.000 во 19. финале. Со тоа се израмни со четвртопласираниот Пит Сампрас на листата на најуспешни во таа категорија. Пред нив е Андре Агаси со 17, како и Рафаел Надал и Роже Федерер со по 19.

Енди Мари остана на шестото место со осум титули од само десет финалиња. Во меѓусебните дуели Ѓоковиќ сега води со 8:5. Во финалињата се имаат сретнато пет пати - на Ѓоковиќ ова му беше втора победа.