06.04.2012, 11:06 Шпанските екипи доминираат во Лига Европа
Атлетико Мадрид - Валенсија и Спортинг Лисабон - Атлетик Билбао ги сочинуваат полуфиналните двојки
Сите три шпански екипи изборија пласман во полуфиналето на Лига Европа. Четвртата екипа во 1/2 финалето е Спортинг, кој го елиминира Металист. Во полуфиналето ќе ја проследиме шпанската пресметка Атлетико Мадрид - Валенсија, додека Спортинг ќе ги одмери силите со Атлетик Билбао.
Сензацијата на сезоната Атлетик Билбао одигра повторно супер меч со Шалке, овојпат 2-2 во Баскија, но пресудија импресивните 4-2 од Гелзенкирхен. Клас Јан Хунтелар и Раул на двапати им носеа некаква надеж на Германците со две водства дека може да се изборат за нешто повеќе, но Гомез и Сусаета не дозволија Атлетик да биде поразен макар и со еден гол. На Шалке му беше потребна победа со три разлика за да оди понатаму или триумф со повеќе постигнати голови во однос на тие на Билбао.
Фудбалерите на Валенсија на Местаља го декласираа АЗ Алкмар со 4:0. На екипата на Унаи Емери и беше потребна и минимална победа со оглед дека првиот дуел заврши 2:1 за АЗ, но Валенсија доминираше на вечерашниот дуел. Серијата голови ја отвори Рами во 15. и 17. минута, Алба во 56. минута зголеми на 3:0, а убедливиот триумф го потврди Пабло на десет минути пред крај.
Спортинг Лисабон во последниот меч се избори за реми 1-1 со Металист, иако Украинските се бореа по примениот гол да изнудат продолженија и да ја пролонгираат неизвесноста. Спортинг ќе се соочи со Атлетик во второто полуфинале.
Мечевите се закажани за 19 април, а реваншите ќе се играат на 26 април.
|
