04.04.2012, 13:18 Џејмс и Ентони со сезонски рекорди
Мајами по четврти пат во сезоната ја совлада Филаделфија, овојпат со 99:93, Индијана подобра од Њујорк со 112:104 со пресврт во второто полувреме
Четврта сезонска победа над Филаделфија и 16-та во низа на домашен терен во отсуство на Дерик Роуз остварија кошаркарите на Мајами во НБА лигата. Славеа со 99:93 во натпревар во чиј центар на внимание беше Леброн Џејмс. Човекот впиша личен рекорд во оваа сезона, постигна 41 кош, негови беа 12. од последните 14 на неговата екипа, а најголема поддршка притоа имаше од Марио Чалмерс кој уфрли 19 поени. За „жешките“ ова е 48 радост сезонава до која стигнаа благодарение на одличната игра во одбрана во последните две четвртини.
Коби Брајант одново во улога на спасител на тимот на Лос Анџелес Лејкерс. Првата ѕвезда на „езерџиите“ постигна тројка на 6,8 секунди до крајот и не дозволи да биде прокоцкана предноста од 17 коша што ја имаа неговите соиграчи во дуелот со Њу Џерси. Во триумфот против нетси со 91:87 тој вгради 24 коша, дабл-дабл ефект забележаа Пау Гасол (22 поена, 12 скока) и Рајмон Сешнс (19 поени, 11 скока). Лиде�� во гостинскиот состав беше Дерон Вилијамс со 20 поени.
И додека играчите на Њу Џерси не успеаја да направат пресврт тоа им појде од рака на нивните колеги во Индијана кои во второто полувреме ја анулираа позитивата од 17 коша на Њујорк за конечни 112:104. Последниот период пејсерси го добија со 40:17, а прв стрелец меѓу нив беше Дени Грејнџер со 27 поени. На никси кои настапија без Амар Стадемаер и Џереми Лин не им беа од помош ниту 39 коша на Кармело Ентони, рекордни за него во оваа сезона.
Резултати: Торонто - Шарлот 92:87, Кливленд - Сан Антонио 90:125, Индијана - Њујорк 112:104, Мајами - Филаделфија 99:93, Детроит - Орландо 102:95, Мемфис - Голден Стејт 98:94, Сакраменто - Феникс 100:109, Лос Анџелес Лејкерс - Њу Џерси 91:87.
|
