Георгиевски си ја зголемува преговарачката цена

Освен Георгиевски и Жерновски, во „Пелистер коалицијата“ се и други лидери на мали партии

Светлана Унковска

Четирите партии на опозициската десница заедно со партии од центарот вчера и официјално ја одржаа првата заедничка средба, откако претходно имаа одвоени средби за како што самите велат, меѓусебно испитување на пулсот.

Во центарот на Скопје, во ресторанот „Пелистер“ на маса се најдоа првите луѓе на партиите на ВМРО-НП Љубчо Георгиевски, на Достоинство Стојанче Ангелов, потоа Наталија Ивчева со дел од партиското претседателство на Обединети за Македонија и на ЛДП, Андреј Жерновски.

На оваа средба не само што не беше поканет лидерот на СДСМ Бранко Црвенковски, кој упати покана за формирање на сеопфатен опозициски фронт, туку, како што брифираат, за време на разговорите воопшто не станало збор за идни разговори со првиот социјалдемократ. Иако се вели дека во оваа, се уште неофицијална коалиција нема лидер, лидерството му припадна на Љупчо Георгиевски за кој неофицијално дознаваме дека бил на чело на разговорите.

Иако се уште нема усогласена платформа на дејствување, од „Пелистер коалицијата“ тврдат дека до платформа ќе дојдат лесно бидејќи го надминале најважното, а тоа е дека се договориле разликите да ги остават настрана и да се концентрираат на она што ги спојува, односно како да се спротивстават на лошите политики на власта.

Дали оваа коалиција од “Пелистер“ ќе биде сериозна закана по примерот на хрватската „Кукурику“ коалиција која исто така се договараше во ресторанот по чие име потоа и беше наречена. Хрватската „Кукурику“ коалиција се обедини од четири партии (СДП, ХНС, ИДС и ХСУ) која на парламентарните избори успеа да ја симне од власт владејачката ХДЗ.

Во едноиполчасовната средба, како што информираа, се разговарало за главните проблеми во државата кои според нив се недостатокот на демократијата, демократијата и притисоците врз медиумите, како и евроатлантските интеграции.

„Најинтересно е тоа што оној кој нас не спои, да седнеме сите заедно, не е тука со нас, туку тој е во Владата“, изјави вчера Жерновски пред почетокот на средбата. Според него главните проблеми во државата, како што се економијата, меѓуетничките односи, демократијата, назадувањето во евроатлантските интеграции се прашањата за кои имаат исти ставови и на кои ќе се концентрираат во заедничкиот настап.

За сега се уште нема најава кога и дали ќе се одржат некакви првични контакти и разговори со лидерот на најголемата опозициска партија Бранко Црвенковски, кој прв ги упати повиците за опозициско обединување. Се чини дека постои голема резерва на помалите партии за тоа каков ќе биде односот на СДСМ кон нив.

„Се уште е рано да дојде до средба и разговори со СДСМ, не сме размислувале за скорешна средба и мислам дека е рано за еден поширок фронт“, рече Жерновски.

Првите оцени на посматрачите се дека состанокот во „Пелистер“ на кој се слу��еше пица, ќе ги поремети плановите за поширок антивладин фронт кој е идеја на Црвенковски.Нема сомнение дека Георгиевски, ако веќе е принуден да коалицира со некогашниот лут противник Црвенковски, решил политички скапо да го наплати можниот идеолошкиот карамбол.