22.03.2012, 15:33 ВМРО-ДПМНЕ предлага нов закон за лустрација
Пратеничката група на ВМРО-ДПМНЕ предлага комплетно нов закон за лустрација, чиј текст денеска им е поделен на сите пратенички групи и независни пратеници во Собранието. Законот ќе биде официјално поднесен откако до пратеничката група ќе пристигнат забелешките од сите претставници во Собранието.
Текстот на законот за определување на услов за ограничување за вршење на јавна функција, пристап до документи и објавување на соработката со органите на државната безбедност, како што е насловен документот, е изготвен во соработка со ДУИ и парламентарните коалициски партнери на ВМРО-ДПМНЕ.
Координаторот на пратеничката група Силвана Бонева изјави дека, меѓу другото, со предложениот законски текст се предвидува со опсегот да бидат опфатени лица кои стекнале капитал во претпријатијата со општествена сопственост, согласно Законот за трансформација на претпријатија со општествен капитал.
Исто така се предвидува јавно објавување на имињата на соработниците и можност физички лица да имаат пристап до информациите собрани за нив, на нивно барање, на барање на нивни роднини по прва линија до втор степен, вклучително и на лица овластени од нив со полномошно заверено на нотар. Комисијата, меѓу другото, ќе има надлежност и да покренува постапка по иницијатива на трети лица.
Временскиот опфат ќе биде до 2006 година, односно, како што појасни Бонева до носењето на Законот за слободен пристап на информации од јавен карактер.
|
