19.03.2012, 15:23 Ново обвинение за „Метастаза“
Сосема кратко траеше денешното судење на лекарите обвинети во случајот „Метастаза“, бидејќи Јавниот обвинител поднесе нов обвинителен акт. Станува збор за прецизирано обвинение, кое обвинителот Златко Биковски им го достави на обвинетите и на нивните бранители.
Со оглед на тоа што новото обвинение е напишано на 73 страници, одбраната побара време за негово проучување, но уште при првото разгледување на обвинението, адвокатите се на мислење дека тоа многу не се разликува од старото обвинение, дотолку повеќе што кривичните дела кои беа наведени уште со првиот акт и сега се на сила.
Случајот „Метастаза“ почна со приведување и притворање на лекари, членови на прво- и второстепени комисии чија цел била проверка на граѓани кои исполнувале право на инвалидски пензии. Заедно со лекарите на удар на полицијата и Обвинителството се најдоа и граѓани кои беа обвинети дека вршеле посредувања, односно пронаоѓале заинтересирани лица за остварување на право на инвалидска пензија, а потоа ги договарале износите, кои, наводно, завршувале во џебовите на лекарите. (Љ.С.)
|
