21.03.2012, 15:42 СДСМ: Се редефинира македонскиот идентитет
Жестока расправа на денешната собраниска седница околу Предлог-програмата за одбележување годишнини од значајни настани и личности во 2012. Предлогот да се слави еден век од албанското знаме на 28 ноември со државни пари за СДСМ е непринципиелен и резултат на партиски пазар на коалициските партнери ВМРО-ДПМНЕ и ДУИ.
Гордан Георгиев, претседател на собраниската Комисија за култура која ги утврдува годишните програми за јубилеи посочи на заборавени настани што се симбол на македонскиот идентитет, како 60 години од првиот роман на македонски јазик „Село зад седумте јасени“ и првиот игран филм „Фросина“, кои се дел од Предлог-програмата.
„Се плашиме од редифинирање на македонскиот идентитет, да се забораваат неговите најзначајни столбови-како што е јазикот, да се забораваат корифеите од НОБ, а да се повикуваме на далечно минато и антика“, рече пратеникот, додавајќи дека не треба да се погрева актуелната „ровка и зовриена меѓуетничка атмосфера“.
СДСМ бара повлекување и на предлогот да се одбележат сто години од назначување на Мехмет Паш Дерала за министер за одбрана во првата влада на Албанија, бидејќи потекнувал од Гостиварско. Рече дека тоа е преседан што во иднина може да повлече барања да се слават назначувањата на Никола Пашиќ, кој работел за големосрпски интереси, или на Андреј Љапчев, кој бил министер за војна во Бугарија, поради нивното македонско потекло.
Илија Димовски и Влатко Ѓорчев од ВМРО-ДПМНЕ му забележаа на Георгиев дека е контрадикторен во ставовите бидејќи еднаш обвинува за моноетнички проекти на ВМРО-ДПМНЕ и антиалбанска политика на премиерот, а потоа дека оваа партија е премногу попустлива во прифаќањето на барањата на ДУИ.(П.Р.)
|
