Од СДСМ велат дека од Груевски и ВМРО-ДПМНЕ зависи дали опозицијата ќе почне да практикува „интензивна улична демократија“

Александра М. Митевска



Опозицијата повторно излегува на протести. Една и пол година по големиот протестен марш во Скопје, кој ги навести ланските предвремени избори, социјалдемократите, за синоќа, имаа најавено масовен собир пред општинската зграда во Аеродром, каде што требаше да се обрати партискиот лидер Бранко Црвенковски. Како повод за организирање на протестот се наведува притисок од ВМРО-ДПМНЕ, со цел да се оневозможи СДСМ да одржи трибина. Причините, пак, на ваков начин да се изрази незадоволството се чинат многу подлабоки.

Настанот во Аеродром се најавува како увертира во пожестоко опозициско дејстување контра Владата, при што не се исклучува ни улична демократија.

„Од однесувањето на Груевски и на ВМРО-ДПМНЕ зависи дали опозицијата ќе практикува интензивна улична демократија. Ако го следиме искуството со актуелната власт во изминатите шест години и нејзиниот недемократски карактер и самоволие, тогаш протестите ќе станат неминовност“, велат од СДСМ.

Од најголемата опозициска партија, официјално, велат дека единствен начин да се спротистават на „тоталитарното однесување на власта“ е да го подигнат степенот на мобилизација на партијата и дека поради тоа СДСМ бил активен на сите нивоа на политичко организирање.

„Пораката со протестот во Аеродром е многу јасна. Повеќе нема да го одмолчуваме самоволието на ВМРО-ДПМНЕ и на неговите функционери“, велат од СДСМ.

За денеска е најавена седница на Централниот одбор на Нова социјалдемократска партија (НСДП), коалициски партнер на СДСМ. Од состанокот треба да произлезе стратегија за дејствување на НСДП, велат од оваа партија.

Во предлог-стратегијата, меѓу другото, се наведува дека „разните облици на организирање и манифестирање на незадоволство, како што се бојкотот, масовните протести, блокади, штрајкови и граѓанска непослушно��т, ќе ги делегитимираат властодршците и нивните извори на поддршка, вклучувајќи ја и лојалноста на нивните воени и полициски бранители“. Во документот на НСДП се посочува и дека ненасилните методи на дејствување на опозицијата треба јасно да се разликуваат од методите на Владата, како и дека „бојкотот на единката, насочен кон институциите на државата, нема да засегне никого додека бојкотот на масата е политичко - економски земјотрес“.

Жестока политичка комуникација на релација СДСМ - ВМРО-ДПМНЕ го обележа вчерашниот ден, во очекување на опозицискиот протест. Попладнето, подмладоците на повеќе политички партии, на иницијатива на младината на СДСМ, во просториите на Собранието на Скопје, потпишаа Декларација со која се осудува насилството на младите, како реакција на инцидетите што минатата недела го потресуваа главниот град. На настанот немаше претставник на Унијата на млади сили на ВМРО-ДПМНЕ, а претседателот на подмладокот на социјалдемократите Дарко Давитковски искоментира дека би сакал да верува дека се работи само за суета, а не за отсуство на политичка волја кај владејачката партија.

Од ВМРО-ДПМНЕ велат дека немале намера да бидат дел од формални настани и да подржуваат формални декларации, кои во својата суштина не оставаат простор за реално дејствување. Вмровскиот институт „Павел Шатев“ објави анкета, според која, кога утре би имало парламентарни избори, ВМРО-ДПМНЕ би освоила 24 проценти од гласовите, а СДСМ 14, додека 32,4 отсто од испитаниците сметаат дека ВМРО-ДПМНЕ ќе победи на локалните избори, наспроти 15,1 процент кои мислат дека победник ќе биде СДСМ...

Сите овие настани укажуваат дека зоврива политичката атмосфера на два месеци пред самитот во Чикаго, кој се најавува како настан што би можел да предизвика пресврти на домашен политички терен. Од СДСМ ги најавија локалните избори во почетокот на 2013 како прво наредно соочување со ВМРО-ДПМНЕ, што би значело дека дотогаш нема да се инсистира на нови предвремени парламентарни избори. Но, иако до локалните избори има уште цела година, јасно е дека натпреварот е веќе почнат и дека влогот е голем.