Трајановски: Скопје ќе биде поделен на квартови и блокови

Град Скопје со новиот ГУП ќе биде поделен на 30-тина квартови.

Град Скопје со новиот ГУП ќе биде поделен на 30-тина квартови. Секој од квартовите ќе биде поделен на неколку блокови, а се претпоставува дека ќе има од 170-180 блокови, изјави денеска скопскиот градоначалник Коце Трајановски на работната средба за ГУП 2012-2022 на Град Скопје што се одржува во Берово.

Секој блок ќе има своја идентификација и назив. Трајановски смета дека во рамки на квартовите ќе има одредени услови кои ќе треба да се исполнат, а во блоковите нема да има бидејќи тоа се помали единици.

Според Трајановски, ова ќе биде добро и од аспект на планирање и идентификување, и за стручните служби и за граѓаните. Ова, како што рече, е добра новина во правењето на новиот ГУП на Град Скопје и додаде оти сите поголеми градови, Загреб и Белград веќе имаат блокови и квартови.

Одговарајќи на новинарски прашања, Трајановски рече дека во Град Скопје има околу 100 илјади нелегални градби од кои во општина Гази Баба се околу 16 илјади.

Со новиот ГУП, Трајановски смета дека добар дел од овие нелегални градби ќе може да се легализираат. Нема да се легализираат оние градби каде треба да поминуваат сообраќајници и булевари.

Работната средба во Берово е една од последните консултации со 10-те скопски општини, со градоначалниците и стручните служби. Во меѓувреме се прават елаборати од еколошки аспект. Се очекува во средината на јули да биде донесен Нацрт ГУП-от. Во втората половина на јули, август или почеток на септември да бидат јавните расправи и до средината на септември се очекува да биде донесен новиот ГУП на Град Скопје.