Венизелос моли да го изгласаат

Кандидатот за лидер очајно продолжува да се извинува поради грешките на својата партија

Атина – Единствениот кандидат за лидер на ПАСОК, кој треба да биде изгласан в недела на партиските избори, вчера на прес-конференција повеќе од десет пати им се извини на граѓаните во лично име и во име на партијата за грешките што ги направиле и со молба испрати порака и кон симпатизерите и кон членовите на ПАСОК в недела да дојдат на гласање. Грчките медиуми коментираат дека е можно в недела голем дел од членовите на Социјалистичката партија да се појават, но да пуштат бели листови, без да гласаат за Венизелос. „В недела почнуваме освежени и емотивно и политички“.

„Мојот повик ги надминува границите на ПАСОК, сакаме да стапиме во контакт со сите граѓани кои преживуваат во кризата, кои имаат проблеми и поплаки, се бунтуваат, но длабоко во себе знаат дека само преку политичката процедура можеме да најдеме решение за проблемите“, истакна Венизелос, оценувајќи дека гласањето на 18 март за лидер на ПАСОК е прослава на демократијата и граѓанското учество.

И Адонис Самарас и Евангелос Венизелос, кои прв пат одат на избори како лидери на партии, знаат дека нема да се справат само со јавноста, која е лута на владејачката партија, туку јавност која им е лута на сите грчки политичари одговорни за новите мерки кои уште посилно удираат по домашниот буџет на грчкото семејство. Последната анкета на весникот „Понтики“ покажа дека одлучувачки фактор за граѓаните на овие избори нема да биде политичката програма, туку нивната влошена финансиска состојба и празните џебови.

Според резултатите на анкетата на „Понтики“, граѓаните со празни џебови нема да им дадат ни 40 отсто заедно на двете најголеми партии Нова демократија и ПАСОК. Десничарите Нова демократија се очекува да освојат најмногу гласови, но не доволно за да формираат сами влада. Како што се гледа од резултатите во „Понтики“, Нова демократија има 23 отсто поддршка, а ПАСОК само 13,5 отсто. Веднаш до ПАСОК се левичарската СИРИЗА и комунистичката ККЕ со поддршка од 12,5 отсто. Во собранието, според овие резултати, се очекува да влезат осум партии. Најмногу изненадува фактот што резултатите покажуваат дека во собранието би можеле да влезат и ултранационалистите Хриси Авги, кои поради своите радикални десничарски позиции и активности се сметаат за нацистичка партија. (М.П.)