15.03.2012, 11:45 ОМД ја поздрави Резолуцијата на ЕП за Македонија
Обединетата македонска дијаспора (ОМД) го поздравува усвојувањето на резолуцијата на Европскиот парламент, во која уште еднаш европратениците бараат од Европскиот совет да утврди датум за почеток на преговори за прием на Македонија во ЕУ.
ОМД смета дека оваа резолуција ги отсликува позитивните препораки за напредокот на земјата во 2011 година од Европската комисија.
Според организацијата, одлуката на Меѓународниот суд на правдата за Времената спогодба, влијаеше резолуцијата да добие мнозинство гласови бидејќи беше изгласана со 582 гласа за наспроти 70 против.
- Препорачуваме до Европскиот совет да ја почитува Резолуцијата на европарламентарците и Одлуката на МСП, кој минатата година го потврди очигледното прекршување на меѓународното право од грчка страна во врска со тн „прашање за името“. Спорот за името е внатрешен политички проблем во Грција и е одвоено прашање од членството на Македонија во меѓународните институции, вели претседателот на организацијата Методија Колоски.
Европскиот парламент со огромно мнозинство гласови вчера ја усвои резолуцијата за напредокот на Република Македонија во 2011 година, во која уште еднаш се бара од Европскиот совет да утврди во најкраток рок, датум за почеток на преговори за прием на Македонија.
|
