Ставрески: Доволно направивме за бензините

Државата дала огромен придонес за да се одржува нивото на цените, вклучително и на бензините. Македонија има најниски оданочувања и трошоци во тој дел. Вака вчера вицепремиерот и министер за финансии Зоран Ставрески одговори на прашањето на новинарите дали се размислува за намалување на акцизата за горивата.

Според првиот финансиер, државата не ги зголемила даноците во овој период, како што направиле речиси сите европски земји. „Сите земји во ЕУ, 25 од 27 земји, во изминатиот период го зголемија данокот и со тој данок ја оптоваруваат цената на бензините и сите други цени. Ние тоа не го направивме и стапката на ДДВ од 18 отсто во Македонија е практично најниска во регионот и пошироко во Европа, а другите земји одеа со покачување на стапките до 23, 25 отсто, а некои дури и до 27 проценти“, појасни вицепремиерот, додавајќи дека Владата дала огромен придонес, колку што може во својот дел, за да се одржува нивото на цените, вклучително и цената на бензините.

Тој посочи дека монетарната и фискалната политика ќе останат во рамки на планираното, со што ќе биде остварен таргетот за инфлацијата, односно таа годинава да остане на ниско ниво под три проценти. „Сметам дека најбитно прашање за движењето на инфлацијата е дали ќе имаме здрава фискална и монетарна политика, односно посветеноста на фискалната и монетарната политика за одбрана на таргетираното ниво на инфлација. Тие ќе бидат реализирани и можам да ве уверам дека и јас и гувернерот ќе опстоиме на зацртаните политики“, рече Ставрески. (Ек.Р.)