Луксузот на „Салвадор Алјенде“

Како државата и' се оддолжи на сопругата на загинатиот претседател

Горан Адамовски



Плац од преку 1.700 квадратни метри и 300.000 евра за куќа до 300 квадрати беше помошта што државата и' ја додели на Вилма Трајковска откако нејзиниот сопруг, претседателот Борис Трајковски загина во авионска несреќа кај Мостар во 2004 година. Владата донесе решение и за други привилегии што на семејството Трајковски требаше да му помогне за полесно да ја пребродат големата загуба.

Кражбата во новоизградената куќа на падините на парк-шумата во Водно, во кое живеат Вилма Трајковски и нејзините две деца ја заинтригираа јавноста. Палата што може да се види само во холивудските филмови, стана лесен плен за умешни крадци, кои го искористија фактот што луксузниот објект нема свое обезбедување.

Поранешниот премиер Владо Бучковски бил изненаден кога завчера преку медиумите видел каков е финалниот производ на куќата на Водно. Се сеќава дека тогаш по трагичната смрт, државата одлучила да им помогне на најблиските на претседателот.

„Се обврзавме да го плаќаме школувањето на децата, кое може да биде и надвор од земјава, на госпоѓа Трајковска и' обезбедивме годишно по четири авионски билети за учество на конференции и слични пригоди каде што ќе биде повикана, но најмногу контроверзии имаше околу куќата, односно изградбата и трошоците за оддржување“, се присетува поранешниот прв човек на Владата.

Тој вели дека членовите на семејствата на останатите соработници на Трајковски, кои несреќно загинаа во Босна и Херцеговина, добиле еднократна парична помош и им биле платени трошоците за закоп.

Живко Кондев, шеф на кабинетот на Киро Глигоров, вели дека неодамна починатиот претседател одбивал да користи какви било привилегии што му следувале како шеф на државата.

„Тој и кога беше претседател, одбиваше да живее во резиденција. Не ги користеше можностите да користи послуга, да бидат платени режиските трошоци и други привилегии. Можеше, ама не сакаше. Таков човек беше, затоа и погребот беше на сметка на семејството“, ни изјави Кондев.

Што денеска државата му плаќа на семејството Трајковски е тешко да се каже. Владиниот портпарол Мартин Мартиновски не беше запознаен со детали и само кусо ни одговори дека „се плаќало се' што било предвидено во Законот за поранешни претседатели“.

Вилма Трајковска ниту вчера не се јавуваше на мобилен телефон, ниту, пак, одговараше на смс-пораки. Своевремено, откако медиумите се интересираа зошто куќата е многу поголема од предвидените 300 квадрати, таа изјави дека се одлучила да изгради дополнителни два дела за своите деца, за што зела кредит. Тврдеше дека еден дел од куќата ќе биде одвоен за музеј во чест на експретседателот.

Во меѓувреме, полицијата трага по крадците, кои изминатиот викенд од палатата на Водно одзеле украсни камења, прстени, бурми, колекција охридски бисери, обетки од „Сваровски“, злато, бижутерија, девизи и лаптоп. Сепак, нема нови моменти во истрагата, потврдуваат од МВР.

Кражбата била извршена тој начин што арамиите ја прескокнале жичената ограда, ја скршиле двокрилната врата, влегле во куќата и ја исклучиле струјата. Од спалната соба и од поткровјето ги украле вредните предмети и побегнале. Никој од малкуте соседи што живеат спроти хотелот „Панорама“ не забележале ништо.

Три куќи во една

Семејната куќа на покојниот претседател Борис Трајковски е изградена пред неколку години на плац со површина од околу 1.700 квадратни метри. Иако претставува еден објект, практично е составен од три дела, независни еден од друг, секој со посебни влезови и без заедничка внатрешна комуникација. Заеднички им е само дворот во кој има и базен од задната страна. Објектот има приземје, еден кат и потпокрив и е граден според идеите на сопругата на претседателот, Вилма Трајковска.

Како што е познато, првично требаше да биде изградена една станбена индивидуална куќа со големина до 300 квадратни метри, за што средства обезбеди државата. Но, Трајковска го смени планот и одлучи да изгради уште два дополнителна дела наменети за нејзините две деца. Средниот објект е најголем и има површина од 300 квадратни метри, додека страничните објекти се со големина од 250 до 300 квадрати. Трајковска порано изјавуваше дека има намера средишниот објект да го направи меморијален центар со спомен соба за претседателот Трајковски.