Семејството на Зоран Ѓинѓиќ не побара ни динар

Мајката Мила Ѓинѓиќ вели дека не би можела да потроши ништо од тие пари

Семејството на убиениот српски премиер Зоран Ѓинѓиќ се' уште нема побарано отштета за неговото убиство, иако на тоа има законско ��раво.

„Срам ми е да барам пари за мртвиот син“, ги пренесоа деновиве зборовите на Мила Ѓинѓиќ, мајка на убиениот премиер, некои српски медиуми. „Не би можела да потрошам ништо од тие пари“.

Девет години по атентатот кој ја згрози не само Србија туку и меѓународната заедница, Ружица вели дека поголема сатисфакција за неа би било кога би се открила целата политичка заднина на убиството.

Отштета, како што пишува српскиот медиум „Ало“, не побара ни сестрата на Зоран, Гордана Филиповиќ, ниту пак неговата вдовица Ружица.

Според законот, семејството на убиениот има право да ја тужи државата зашто не ги презела потребните мерки за обезбедување на премиерот, кој беше убиен среде Белград. Уште повеќе, случајот би завршил позитивно за семејството зашто осомничените Милорад Улемек-Легија и атентаторот Звездан Јовановиќ биле припадници на Единиците за специјални операции на МВР-Србија.

Никој не може да прецизира колкава би била отштетата доколку семејството реши да тужи, не постои тарифа за тоа, вели судија на еден белградски суд, но правници за „Ало“ тврдат дека според досегашната практика – отштетата не би била помала од половина милион евра.

Имено, во случајот со убиениот поранешен српски претседател Иван Станболиќ, беше одобрена финансиска сатисфакција. Семејството, сопругата и децата добија 250.000 евра отштета за свирепото убиство кое се случило на 25 август 2000 неколку дена по неговото мистериозно исчезнување.

Сопругата Катарина и децата Тијана и Вељко водеа судски спор и барале многу поголема отштета, но на крај е исплатен споменатиот износ, кој во име на државата го договори српското Министерство за правда.

Уште еден случај од соседна Србија е интересен: по четврт милион евра отштета добија и семејствата на три лица кои настрадаа во обидот за атентат врз опозиционерот Вук Драшковиќ на ибарската магистрала.