14.03.2012, 14:49 Струја удри дете во училишен двор
Деветгодишникот се допрел за необезбеден кабел, по што бил отфрлен од струјниот удар. За среќа, не е тешко повреден
Деветгодишно момче се здоби со повреди во струен удар во инцидентот што се случи во дворот од училиштето „Рајко Жинзифов“ во скопската населба Чаир кога детето си одело дома по завршување на часовите. Ученикот се допрел за неозбеден кабел од металниот столб за улично осветление и струјата го отфрлила. Куриозитет е што столбот не бил во функција веќе две години. Тоа го тврди директорот на училиштето, кој додава дека побарале да се отстрани опасниот метален столб околу кој секојдневно поминуваат децата.
Според полицијата, вчера околу 17,50 часот, детето додека излегувале од училиштето, случајно се допрело за електричниот столб во училишниот двор, настанал струен удар од кое момчето се здобило со повреди. Веднаш било префрлено во Градската болница.
„Повреденото дете е донесено во болницата завчера околу 18 часот. Како што разбравме момчето се фатило за необезбеден кабел, по што било отфрлено од струјата. Притоа се здобило со мала повреда на рамото, но имаше тахикардии, предизвикани од струјата која што поминала низ неговото тело. Тоа во моментов е сместено на Детската клиника и е во стабилна состојба. Очекуваме тахикардиите да се смират и за ден –два детето да биде пуштено дома“, велат во Градската болница во Скопје.
Во ОУ „Рајко Жинзифов“ велат дека ова не е прв инцидент што го предизвикал опасниот метален столб сместен во училишниот двор. Пред две и пол години се случила слична несреќа, по што било побарано да се острани дефектот.
„Дојдоа од општината и го средија проблемот. Ама ете сега пак се случи проблем, па пријавивме во полицијата и во ЕВН да се острани дефектот. Всусшност, ние бараме и дислокација на столбот, кој и онака не е во функција. Фала му на бога што детето е добро“, вели директорот на училиштето Кадри Агуши.
|
