Судијката Неделковска се сели во Врховен

Унапредување во повисокиот апелационен суд доби и судијката од скопскиот кривичен суд што го осуди Љубе Бошкоски на 7 години затвор

Гордана Дувњак


Претседателката на скопскиот Кривичен суд Лидија Неделковска заминува во Врховниот суд. Зад нејзиниот избор вчера застанаа 11 од 14 членови на Судскиот совети (отсутен беше само министерот за правда, кој и без тоа нема право на глас). Предлагајќи ја за највисоката судска функција, членот на Советот, Крсте Сиваков, во своја подолга аргументација не штедеше зборови на пофалба и ја претстави како „исклучителна личност како човек и професионалец“, која за својата кандидатура ја имала едногласната поддршка од целиот колектив.

На вчерашната седница, внимание предизвика и унапредувањето во повисокиот Апелационен суд на уште една скопска судијка. Кривичарката Радица Василевска јавноста ја запозна како судијката што го осуди лидерот на Обединети за Македонија, Љубе Бошкоски, на 7 години затвор. Таа прв пат се јави на конкурсот само една недела по изрекувањето на првостепената пресуда, но тогаш беше избран друг судија. За Василевска гласаа едногласно сите 14 членови на Судскиот совет, што не беше случај со други кандидати, поради што еден од членовите процедурално забележа дека изјаснувањето треба да биде за или против, а не со негласање. На ова реплицираше претседателката на Судскиот совет, Александра Зафировска, која рече дека „не може членовите насила да ги тера да гласаат“. Сепак, при следното изјаснување ги повика членовите да гласаат.

И покрај тоа што првиот филтер за врховен судија го поминаа повеќе кандидати, од кои повеќето судии од второстепениот Апелационен суд, при конечното гласање, сепак, членовите и' дадоа предност на енергичната шефица на скопска „единица“. За Неделковска подолго време се говори дека има силна политичка поддршка од владејачката гарнитура и е сигурен кандидат за преселба во највисокиот суд. Неделковска се јави на двата конкурса за избор на судии, во кои на првиот требаше да се пополни едно место, а на вториот кој допрва треба да се случи има три слободни места. Во судските кругови извесно време се шпекулира дека изборот на Неделковска е првиот чекор, но дека нејзините амбиции се поголеми. Имено, се говори дека таа претендира и за претседател на Врховниот суд, бидејќи четиригодишниот мандат на актуелниот прв човек Јово Вангеловски завршува во јули оваа година. Сега поранешната претседателка на судска „единица“ судеше повеќе големи случаи, како „Пепел“, „Бродец“, „Јака Табак“... Во времето кога почна истрагата за „Пајажина“, токму Неделковска се пожали дека добивала анонимни телефонски повици од Германија, но случајот не го пријавила во МВР.

Судскиот совет вчера избра и неколку судии во пониските судови. Тројца нови судии беа избрани во битолскиот основен суд: Дејан Крстанов, Александар Илиевски и Беџет Мехмети. Во скопскиот кривичен суд е избрана Васка Николовска-Масевска, а пополнети се и двете празни места во граѓанскиот суд со Весна Трајанова и Јахона Садику. За судија во Основниот суд во Гостивар е избран Реџеп Асани, а во тетовскиот суд – Хуриете Цека и Хасан Асани. Претседател на гостиварскиот Основен суд, пак, стана судијата Ќирко Михајловски.

Бонбониера за Василевска


Изборот на Василевска беше повод за собирање на најблиските соработници на лидерот на Обединети за Македонија, кои пред судската зграда се појави со
бонбониера за да ја почестат за унапредувањето. Наталија Ивчева во изјавата пред влезот на судот рече дека „и пред да биде објавена пресудата на Бошкоски, предвидувале дека Василевска ќе биде наградена, а очекуваат наскоро да се вработи и нејзината ќерка како судија“.