Мислења

Махараџи во земјата на мизеријата

Гордан Георгиев

Да не се чудиме ако во наредниот период никне и некој нов, поубав и постар Таџ Махал во центарот на Скопје

ОЧИ ШИРУМ ОТВОРЕНИ

Премиерот беше во Индија, а ја остави Македонија во Индија. Стави турбан на главата, му удри чаламот, и поита по странски инвестиции. Македонија е на прво место во „индексот на мизерија“ според угледниот лондонски „Економист“. Индија е на 17-то место според истото рангирање. Индија е огромна држава со висок економски раст, со голем број странски инвестиции и една од најзначајните држави-инвеститори во светот. Индија е земја со огромни диспаритети во развојот. Се' уште таму живеат милиони бездомници кои не можат крај со крај да врзат, кои живеат со еден долар дневно. Сигурен сум дека премиерот Груевски, опиен од индиските мириси во елитните клубови, не успеал да ги види овие мизерни луѓе кои питаат по улиците на Мумбаи.

И тоа не е за чудење. Бесмислените роуд шоу авантури на владиниот тим се одлични розеви очила и за непрепознавање на мизеријата во која живее македонскиот народ. А таа е очигледна на секој чекор. Анкетите се само еден показател. Тие кажуваат дека три четвртини од граѓаните на Република Македонија со своите месечни приходи можат да платат само за храна и евентуално за сметки. Значи, овие наши граѓани немаат пари за патувања, за задоволства, за одмор, за кино или театар. Немаат можност да бидат махараџи макар и на еден ден. Половина од нашето население месечните приходи ги троши само на храна. За плаќање на сметките се задолжуваат со кредити или кај пријатели и роднини.

За жал, во Македонија се' повеќе ги гледаме и „Индијците“ од улиците на Мумбаи. Како инаку да го објасниме фактот што низ Делечево и Берово може да се видат граѓани кои собираат пластични шишиња низ улиците? Притоа, тоа го прават тајно, бидејќи доколку ги фатат ќе им биде одземена социјалната помош. Како да ја објасниме старо новата појава на крадење бензин со црево од резервоарите на автомобилите освен како резултат на 90 денари за литар бензин? Притоа, Владата нема намера да ја намали акцизата, бидејќи им се неопходни пари за дофинансирање н�� фараонскиот проект на махараџата Груевски. Да не се чудиме ако во наредниот период никне и некој нов, поубав и постар Таџ Махал во центарот на Скопје. Колку да се дополни отчетот на градоначалникот Тодоровиќ.

Просто е неверојатно колку е неодговорна оваа власт кога се дрзнува да промовира нови автобуси и „трамваи наречени желба“ во ситуација кога корисниците на Јавното сообраќајно претпријатие ќе почнат со шлемови и панцири да се возат во автобусите.

Политичките теории на демократии во поделени општества (консоцијални демократии) ги врзуваат економскиот раст и социјалната благосостојба како едни од клучните елементи за мирно решавање на конфликтите. Едноставно е: ако сите имаме по 1000 евра месечна плата, последната работа што ќе ни падне на памет е да го мразиме или не дај боже да се пресметуваме со Другиот. Зошто некој би се симнал од Грчец во Дебар Маало за да истепа некој непознат Друг? Зошто пак некои други би влегле во автобус со палки за да се пресметаат со некои Други кои не го говорат истиот јазик? Или уште пострашно, таквата атмосфера да создава основи за примена на принципот ���кому иде“, кога секој што од било која причина му мисли зло на некој друг (без разлика на етничката или верската припадност) да ја земе правдата во свои раце, особено во ваква „матна“ состојба во општеството.

Токму затоа, идиотската теза во врска со „идиотските тези“ не може и не смее да помине во нашето општество. Одговорот на СДСМ беше јасен: никого не обвинивме, само повикавме на смирување на страстите и апелиравме до институциите брзо, ефикасно и правично да ги разрешат инцидентите. До сега многу малку е направено, а секојдневно (еве и вчера и денес) имаме инциденти низ Македонија. Дали е можно да се навикнавме на ова лудило? Дали ни следува период кога родителите ќе навикнат да не ги пуштаат децата на улица и тоа нема да се сфаќа како премногу страшно, туку како нормално?

За да биде иронијата уште поголема, пред неколку дена почна и експресно се одложи судењето на тепачите на Калето. Уште тогаш СДСМ предупредуваше дека ненормална состојба е кога постариот коалициски партнер преку ден гради црква, а помалиот коалициски партнер преку ноќ ја руши црквата.

Неприродната поставеност на двата коалициски партнери, на која веќе и' се измолкнува било каква можна заедничка платформа, создава атмосфера на недоверба помеѓу граѓаните. Градењето етнонационализам од двете страни и немањето политичка волја да се зауздаат таквите изблици, несомнено создаваат основа за нови и нови изблици. Ставете ги во овој коктел и неподносливата сиромаштија, безработица и немањето на европска перспектива на македонските граѓани, и ете плодна почва за меѓуетнички тензии. И дајте малку сите да се приземјиме во нашите длабокоумни „анализи“. Какви странски тајни служби, какви глупости, какви светски геостратегиски интереси, какви параноични сценарија дека Али и Никола ги договараат инцидентите на работна маса во Влада. Тврдам дека двата коалициски партнери веќе немаат капацитет ниту да се договорат за имињата на улиците, а камоли да прават пеколни сценарија. Но, она што е најстрашно, коалициските партнери и онаа збунета и уплашена министерка за внатрешни работи покажуваат ужасна неспособност да ги смират инцидентите и да ги извадат учесниците пред лицето на правдата. Долго време садеа тикви во истата нива, затоа сега просторот е претесен и не можат ни семките да ги изгрицкаат.

Така е тоа, кога нашиве махараџи ќе го јавнат слонот и ќе влезат во продавница за стакло. Добиваме парампарче.

(Авторот е пратеник

и потпретседател на СДСМ)