Едиторијал

Поевтин бензин за локални избори

Маја Томиќ

Треба да ги почекаме локалните избори за да добиеме поевтин бензин. Изгледа дека на Владата само пред избори не и' е проблем да донесе интервентни мерки со кои, всушност, политичарите им се додворуваат на гласачите. Тоа, на пример, се случи минатата пролет, пред вонредните парламентарни избори, кога за големо чудо на сите, но и за прв пат, Владата ги намали акцизите на горивата за период од два и пол месеци и цената им падна за околу два денара. Притоа, ги отфрлаше зајадливите коментари дека во заднина стојат политички интереси и тврдеше дека едноставно сака да им помогне на граѓаните и на бизнисот.

Па, ако не беше така, зошто сега чека за слична мерка со која ќе се зауздаат цените на горивата? Од лани пролетта наваму цените на горивата скокнаа за речиси 20 отсто и сите упорно бараат од Владата да реагира, но попусто. Се' што добиваме од владините претставници се само фрази, дека Владата будно ја следи состојбата на светските берзи, дека не било така едноставно да се намалат акцизите или ДДВ-то со што се нарушува проектираната буџетска маса, дека се анализирала состојбата на пазарот и ако се оценело оти е неопходно, ќе се интервенирало со мерки и слични бла, бла, оправдувања. Така Владата ја покажува загриженоста за високите цени на бензините, за се' полошиот стандард и за зголемените трошоци на фирмите.

Со други зборови, повеќе е од очигледно дека во моментов нема намера да донесе некои вонредни мерки со кои ќе го ублажи ценовниот шок од постојаното поскапување на горивата. Луѓето веќе се прашуваат дали повеќе им се исплати да возат кола или да користат јавен превоз. Почнаа да ја споредуваат цената на литар бензин со килограм леб, млеко, па и масло за јадење, како да станува збор за нешто луксузно што не треба секој да си го дозволи, а не за секојдневна потреба. Ако овие факти не и' се доволни на Владата за да интервенира, што уште треба да се каже...

Локалните избори треба да се одржат следната година. Значи ли тоа дека треба да бидеме трпеливи до следната пролет и заради изборите, да добиеме и поевтин бензин? Ако се суди според сегашните светски прогнози, којзнае што не' чека в година. Не се многу надежни предвидувањата на берзанските аналитичари. Повеќето од нив прогнозираат дека цената на суровата нафта, ако дојде до заострување на иранската криза, ќе скокне за една година до рекордни 150-200 американски долари за барел. Така, можно е во меѓувреме домашната цена на горивата да скокне и над 100 денари за литар, па тогаш нема баш многу да ни значат денар-два помалку како помош од Владата.

Спласнаа надежите од почетокот на неделава кога сите некако очекуваа по најновото поскапување на горивата Владата брзо да интервенира и да паднат или акцизите или ДДВ-то, кои најмногу ја дигаат нивната крајна цена. Но, истовремено од овие две ставки и најмногу се полни државната каса, па на Владата не и' е баш едноставно да се откаже од мрсниот колач. Не сакајќи да се откаже од него и не носејќи мерки, Владата сега почна да ја префрла вината на ОКТА. Таа требало да ја смени методологијата за пресметка на цените на дериватите, со што цените ќе се намалеле. За тоа ќе почне да се преговара наскоро. Дали тоа треба да значи дека ако не завршат успешно преговорите и ако ОКТА не се согласи да ја смени методологијата, за високите цени на горивата прстот ќе биде вперен во неа.