19.03.2012, 13:26 Три жртви во напад на еврејско училиште во Тулуз
Загинаа најмалку две деца и едно возрасно лице, јави полицијата
ТУЛУЗ – Вооружен напаѓач отвори оган врз еврејско училиште во францускиот град Тулуз, при што загинаа најмалку две деца и едно возрасно лице, јави полицијата. Најмалку две лица се повредени во нападот што се случи пред училиштето „Озар Хаторах“ во североисточниот дел на градот.
Полицијата е во потрага по напаѓачот, за кој очевидци јавија дека возел црн скутер. Нападот се случи неколку дена откако тројца војници беа застрелани од човек на скутер во истиот дел на Франција.
Претседателот Никола Саркози, министерот за образование и министерот за внатрешни работи се упатија во Тулуз. Големиот рабин на Франција, Жил Бернхајм, кој, исто така, се упати кон градот, рече дека е „ужаснат и запрепастен“ од тоа што се случило.
Вчерашниот напад се случи кога децата и нивните родители пристигнуваа во училиштето „Озар Хаторах“, во областа Жолимен во градот, на почетокот на училишниот ден. Француската телевизиска мрежа БФМ јави дек меѓу загинатите се еден наставник, неговата шестгодишна ќерка и 17-годишен ученик.
Локалните жители веднаш го поврзаа нападот со оној што се случи минатата недела врз војници. Пред една недела беше застрелан 30-годишен војник од падобрански одред во станбена област на Тулуз, додека двајца војници загинаа, а трет беше повреден додека користеа банкомат во градот Монтобан, на одалеченост од околу 46 км.
Кристофер Бокман, хонорарен новинар во Тулуз, изјави за Би-Би-Си дека нападнатите војници биле со етничко потекло и се чинело дека напаѓачот смислено ги напаѓа етничките малцинства во таа област. Тој рече дека градот е затворен додека полицијата ги пребарува улиците во потрага по виновникот.
Министерот за внатрешни работи Клод Геант нареди зајакнување на безбедноста околу сите еврејски училишта во Франција. (Би-Би-Си)
|
