Премиерско добредојде за сењор Слим

На мексиканскиот милијардер, кој идната недела ќе дојде во Македонија, Владата планира да му понуди соработка во енергетиката, телекомуникациите, хотелиерството и експлоатирањето минерални суровини

Македонскиот премиер Никола Груевски идната недела ќе се сретне со најбогатиот човек на светот, Карлос Слим. Министерот за информатичко општество и администрација, Иво Ивановски, вчера изјави дека веќе се потврдени средбите на Слим со премиерот Груевски и со економските министри.

На мексиканскиот милијардер, кој идната недела доаѓа во Македонија, Владата планира да му понуди соработка во проекти од повеќе области, како што се енергетиката, телекомуникациите, хотелиерството и експлоатирањето минерални суровини.

„Ние веќе имаме предложено неколку проекти, кои ќе ги ставиме на маса и за кои ќе продискутираме. Се надеваме дека дел од нив ќе бидат интересни за него и за неговите компании“, рече Ивановски.

На листата, според министерот, се дел од најголемите владини капитални проекти. „На оние што ќе дојдат со Слим ќе им предложиме да ги разгледаат проектите детално. Се надеваме дека ова нема да биде прв контакт и дека по посетата ќе имаме можност повеќе да комуницираме со претставниците на неговите компании“, нагласи Ивановски.

Милијардерот Слим доаѓа во Македонија за да учествува на Комисијата за широкопојасен интернет и дигитален развој формирана од Меѓународната телекомуникациска заедница и УНЕСКО, со која претседава токму Слим. Конференција ќе се одржи од 31 март до 2 април во Охрид.

Слим ќе пристигне во земјава со неговиот приватен авион и засега нема поставено посебни барања околу неговиот престој. Тој доаѓа на покана на министерот Иво Ивановски, со кого лично се познава и веќе неколкупати се среќавале. Тие неодамна ручале заедно во Њујорк кога министерот и го повикал Слим да присуствува на конференцијата во Охрид.

Телекомуникацискиот магнат Карлос Слим и годинава остана на позицијата најбогат човек во светот според магазинот „Форбс“, пред Американците Бил Гејтс и Ворен Бафет. Неговото богатство е проценето на 69 милијарди долари. Слим се наоѓа на првото место на листата трета година по ред. Тој своето богатство го стекна во секторот на телекомуникациите, трговијата, финансиите, суровините и енергетиката. Мексиканскиот бизнис-магнат и филантроп е претседател и главен извршен директор на телекомуникациските компании „Телмекс“ и „Америка Мовил“ и има огромни имоти во други мексикански компании преку својот конгломерат „Групо Карсо САБ“, како и бизнис-интереси на друго место во светот. Седумдесет и двегодишниот Слим сега работи и во секторот на малопродажба, финансиите, суровините и енергетиката. Во последните години мексиканскиот магнат купи големи удели во странски компании како што е синџирот на стоковни куќи „Сакс“ и издавачот „Њујорк тајмс“. (С.М.)