Поглед

Шокот од Вилмаленд

Димитар Чулев

Требаше да се случи една бенигна кражба во елитниот кварт на Водно и јавноста да остане шокирана. Не од тежината на престапот на непознатиот крадец кој „оперирал“ ноќе и ги „олеснил“ домаќините за прилично вреден накит, колку од сознанието дека „местото на злосторството“ била семејна куќа на семејството на починатиот претседател Борис Трајковски.

За жал, озборувањето е основа на креирањето на јавното мислење на секој народ и ТВ-прикажувањето на мегаструктурата на падините на Водно иницираше лавина од прашања, вчудовиденост и иронични коментари: на пример, како ли се снашол ноќниот посетител во кражбената мисија во толкава куќа? Некои веќе и ја нарекоа - Вилмаленд!

Јавноста прашува дали семејниот дом со димензии на струшкиот „Еурохотел“ (како што забележа некој) бил вистинскиот избор и реална сатисфакција за трагичната загуба на сопругот и татко во семејството Трајковски. Ништо не е тајно и материјалната компензација што ја доби семејството беше повеќе или помалку позната работа во јавноста, но, сепак, предимензионираниот објект на улицата која го носи името на еден, исто така, прерано загинат политичар „Салвадор Алјенде“ не може, а да не ги спречи прашањата - зошто и за кого толкава куќа?

Градбата од над 500 квадратни метри ги надминува и најекстензивните потреби за комоција на кое било тричлено семејство, а фактот дека никој местото не го користи како редовно живеалиште отвора простор за шпекулации дека објектот можеби ќе добие идна пренамена...

Жално е што кражбата на личните предмети и накит не предизвикаа чувство на елементарно сочувство со ограбените. Тоа беше потиснато од шокот од мегаломанството кое секако не му прилегаше на Борис Трајковски, кој остана запаметен како скромен човек.