Многу амбиции за градоначалник на Охрид

Иако до изборното соочување има уште цела година, во двете водечки партии ВМРО-ДПМНЕ и СДСМ се чувствува кандидатска напнатост

Веле Митаноски



Охрид - Како што партиските лидери се растрчани на терен, така и во општините ��е' погласно се зборува за можните адути на партиите за градоначалнички функции. Иако до изборното соочување има уште цела година, во двете водечки партии ВМРО-ДПМНЕ и СДСМ се чувствува кандидатската напнатост, колку и тоа да се прикрива. Самостоен настап најавува и ВМРО-НП, со можност во првиот круг да игра за себе. Во вториот, се чини извесно дека освоениот контингент гласови ќе се обиде да го пренесе на потенцијалниот коалициски партнер - СДСМ.

За ВМРО-ДПМНЕ Охрид ќе биде апсолутен приоритет, бидејќи два мандата градоначалникот е од СДСМ. Социјалдемократите, пак, ќе сторат се' за да останат на тронот. Кулоарите, засега од таборот на ВМРО-ДПМНЕ ги вртат имињата на претседателот на општинскиот разгранок Атанаско Михаилов, потпретседателот, координатор на советничката група и раководител на Билатералниот комитет за заштита на Охридско Езеро, Дејан Паноски, потоа доктор Никола Бакрачески, директор на Кардиолошкиот центар, поранешниот пратеник сега директор на ЈП за стопанисување со станбен и деловен простор, Цветко Грозданов, лекарот - началник на Интерното одделение во Општата болница, Сашо Василески и други. Михаилов не крие дека загревањето на некој начин веќе почнало и дека се предизборно зголемени активностите меѓу гласачите и симпатизерите.

„Работиме на терен, активностите се зајакнати, но официјални имиња за можни кандидати засега нема. На крајот на краиштата, изборот на кандидат за градоначалник го прави Извршниот комитет и претседателот на партијата. Сите други имиња кои ќе се појават се само шпекулација“, вели Михаилов. Тој признава дека едно од имињата кое се врти во јавноста е и неговото. Вели дека секоја функција што ќе му биде доверена од партијата ќе ја извршува со голема одговорност и мотив.

Дејан Паноски, еден од најекспонираните партиски кадри, особено во делот на екологијата, каде што важи за докажан експерт, како и во активностите на Градскиот совет, вели дека не е оптоварен со тоа прашање.

„Има и други позиции преку кои може да му се помага на Охрид“, вели Паноски.

Во СДСМ се вртат имињата на актуелниот градоначалник Александар Петрески, на локалниот лидер на СДСМ, Наум Јованоски, директорот на училиштето за средно образование „Свети Климент Охридски“, Наум Рилкоски и други. Се говори и дека е можно партијата да има скриен адут, кој се' уште се држи во сенка.

Петрески не крие дека би истрчал уште еднаш како кандидат, иако од членството има се' повеќе сигнали дека два пати му се доста. Најверојатно, и тој го знае тоа, ама мисли дека адут ќе му биде рејтингот. Затоа вели дека не сака да биде единствен кандидат, додека на централното раководство му упатува порака дека би требало да се определи за оној со највисок рејтинг.

„Никој нема ексклузивно право за да се наметнува како единствен кандидат. Јас тоа право, и да ми го дава партијата, не го сакам. Секоја партија, посебно посериозните како СДСМ и ВМРО-ДПМНЕ, треба да одат со кандидат кој има најголеми шанси за победа. Така размислувам и во поглед на мојата кандидатура. Ако анализите покажат дека некој друг има повеќе шанси од мене, поголем рејтинг, зошто јас да условувам и да одам со сила. Јас не условувам како тие од ДПМНЕ“, вели Петрески.