Никола Груевски во Струмица...

Последниот збор за името ќе го имаат граѓаните

Можно решението за името нема да биде конечно се' додека за него не се изјаснат граѓаните на референдум. Ова го најави премиерот Никола Груевски на трибината во Струмиц��.

„Ќе продолжиме да бараме начини да се деблокираме и да се надмине ова прашање. Ќе продолжиме да ја афирмираме судската пресуда од Хаг и ќе продолжиме да се бориме Македонија да стане членка на ЕУ и на НАТО. Меѓутоа, истовремено, како владејачка гарнитура, ќе продолжиме да внимаваме во делот на компромисите, во делот на тоа што се бара од нас, да внимаваме да се прифати нешто што граѓаните на Македонија ќе го чувствуваат достоинствено. И, што е најважно, што и да се договори, што и да се предложи и каков компромис или решение да се најде, политички се обврзавме дека тоа нема да биде конечно се' додека не го прифатат тоа граѓаните на Македонија, односно мнозинството од два милиона граѓани, на државен референдум“, рече премиерот Груевски.

Во полната сала во Центарот за култура ,,Антон Панов“ премиерот и министрите дадоа отчет пред струмичани за реализираните проекти од нивното владеење. Притоа, потенцираа дека Владата и понатаму останува доследна во реализирање на реформите во сите области.

Министерот за здравство, Никола Тодоров, им вети на струмичани довршување на кракот на болницата кој стои недоизграден цели дваесет години. За негово ставање во функција Владата ќе инвестира три милиони евра, а според Тодоров со тоа Струмица ќе прерасне во четврт регионален медицински центар во државата.

Трибината заврши доцна по полноќ, а премиерот и министрите одговараа и на прашања од граѓаните. (С.Т.)