Мое ќоше

Ахмети по свое мислење кај Волерс

Ерол Ризаов

Ахмети: Партиите се невини, пожарите спонтани, Владата не ги гасне, а медиумите лажат

Али Ахмети, лидерот на ДУИ, отиде на редовна консултација и размена на мислења кај американскиот амбасадор Пол Волерс да го чуе сопственото мислење. Откако го слушна гласот на Америка, убаво стокмен излезе пред новинарите и спокојно и' кажа на загрижената јавност кој не стои зад меѓуетничките инциденти и кој не ги потпалува меѓунационалните и меѓуверски пожари во Македонија. Ниту една политичка партија не стои зад насилствата што ја потресуваат државата до граница на дестабилизација, беше авторитетната и смирувачка порака што ја прати Али Ахмети. Кога Ахмети го кажа и тоа дека ДУИ знае кои се пироманите, на сите ни олесна. Огновите се разгореле спонтано од ветер според законите на природата. Кога истовремено дува северец од кај Шара и југо по долината на Вардар, тие се судруваат над Скопје и предизвикуваат кијамет, големо невреме. Колку се посилни воздушните струења и пожесток судирот на студен и жежок воздух, толку невремето и штетите се поголеми.

Штета, голема штета што Ахмети не отиде малку порано кај Волерс, ќе завршеше голема работа. Прво ќе спречеше залуден труд на голем број специјалисти за истражувачки теми кои во повеќе провладини медиуми, независно еден од друг, открија дека инцидентите се организирани од странски разузнавачки служби со цел да ја дестабилизираат Македонија. Дури Ахмети им удри по една заушка на сите тие, како да се обични пацери, изјавувајќи иронично дека во ДУИ не работат врз теории на конспирации. Ако само два-три дена порано отидеше Ахмети кај Волерс, ќе им заштедеше голема енергија на политичките партии да не си ја префрлуваат вината едни на други за меѓуетничките тепачки. Вака, бадијала опозицијата потроши онолкава енергија на која предупредуваше и премиерот Никола Груевски да не се арчи џабе, бидејќи самата помисла дека Владата ги поттикнува меѓунационалните инциденти е идиотска работа. Точно тоа го потврди и Али Ахмети кога онака американски прецизно соопшти не само што пожарите се спонтани, што автоматски значи дека не ги потпалува Владата, туку тоа од своја страна значи дека и партнерот со кој ја дели власта е апсолутно во право кога вели дека е идиотски да се помисли оти Владата е ретардирана дотаму да го гори столчето на кое седи.

Затоа Али Ахмети по разговорот со Пол Волерс ја разјасни целата таа идиотштина. Владата не потпалувала огнови, туку не ги гасне навреме пожарите кои се потпалувале спонтано. Еве како тоа убаво го објасни Ахмети: Мислам дека полицијата и судот, дефинитивно, ова е клучниот збор, треба да ја завршат својата работа, граѓаните да се чувствуваат безбедно. Дефинитивно, Ахмети ги повика и медиумите да си ја вршат својата работа и да не ги тероризираат луѓето, да не се банализираат ситуациите. Медиумите треба да ја кажат вистината, и' соопшти Али Ахмети на целата македонска и албанска јавност и на останатите граѓани од втор ред што живеат во Македонија кои, исто така, не се имуни на пожари.

Добро е што Али Ахмети своето мислење не го соопшти пред да се сретне со Пол Волерс. Замислете да излезеше онака лидерски, самостојно и авторитетно да и' соопштеше на јавноста дека ДУИ има сознанија оти политичките партии не стојат зад инцидентите, дека тие се спонтани како реакции на двојното убиство во Гостивар и инцидентите во Вевчани и во Струга, на спортските терени од навивачките групи, дека Владата и институциите на системот, дефинитивно, ќе треба да почнат нешто да работат за граѓаните да се чувствуваат безбедно, а провладините медиуми треба да престанат да ги тероризираат луѓето и да ги банализираат ситуациите. Медиумите под контрола на власта треба да престанат да лажат. Должни се да ја кажат вистината. Тоа е нивната работа.

Ете ова е мислењето на Ахмети пред да влезе кај Волерс, а откако излезе, го кажа истото тоа само со малку поинакви зборови и со дипломатско американски шмек да не се направи некоја идиотска работа, па да се растури партнерството во поделба на власта, ако се сетат патриотите што сакал да каже.