Поглед
Не е се' во графиконите
 Катица Чангова
Само за две години Македонија направи неверојатен скок од дури 34 позиции на листата на „Транспаренси интернешенел“. На скалата со која се мери индексот за перцепција на корупцијата, Македонија од 105. место во 2006 година се искачи на 72. позиција во 2008. Ова е суштината на новиот, прилично агресивен спот што веќе неколку дена засилено се врти на телевизиите и со кој Владата буквално ги бомбардира гледачите.
За да се зголеми ефектот на зборовите, низ графикони во боја што го прикажуваат рејтингот на Македонија во изминатите години, Владата го доловува фантастичниот успех на реформите „Остваруваме“.
Неоспорно е дека државата, благодарение на добрите закони, постигна извесен напредок во фронтот против корупцијата. Но, тоа позитивно поместување е далеку од фантастично, бидејќи пресуди за корупција нема.
Малку треба да се симнеме на земја. И да имаме мерка за постигнатото. Резултатите на Македонија на антикорупциско поле, сепак, се скромни.
Владата упорно зборува за скокови во места, а не споменува скокови во оцени и намерно избегнува да ги каже. Со оцените што ги заработи Македонија за степенот на корупција, во старт ќе се намали ефектот на успехот пред народот. Ова мерило го знаат сите кои барем малку се разбираат во мерилата на „Транспаренси“. Се' друго може да се дефинира како манипулација и лага.
Еве ги аргументите. Десетките (10) се резервирани за најчистите земји според корупција, а единиците (1) за најзаразените. Лани државата е оценета со 3,3, додека оваа година рипнавме на 3,6. Тоа е напредок од само 0,3 поени. Значи, не добивме ни половина оцена повеќе за да не' вбројат во успешните. Ние сме далеку од врвот на Кеопсовата пирамида. Тука нема никаква тенденциозност. |
