Претходен број

ЕДИТОРИЈАЛ

Што ја замолчи ДУИ?

Светлана Унковска

Со што ли толку се задолжил Али Ахмети кај премиерот Никола Груевски, па се откажа од се' што бараше претходно и на секоја шлаканица од својот владин партнер упорно молчи? До каде ли ќе оди политичката хибернација на ДУИ и зошто интегративците го сведоа своето однесување до степен на трагикомедија, па дозволија да бидат дури и за потсмев?

Колку и да се поставуваат вакви прашања и да се бараат какви било одговори во некаков голем политички пазар меѓу Груевски и Ахмети или, пак, во несфатливата упорност на ДУИ да премолчува само за да не ја бранува тенката коалиција со ВМРО-ДПМНЕ, факт е дека нивното однесување е толку неприродно. Но, истовремено и зачудувачко, што го тера човек да се чуди и да помисли - дали е тоа истата партија од пред изборите? Сето ова не може да се оправда со стравот на Ахмети да биде принуден да ја напушти владината коалиција или, пак, уште повеќе тоа да биде политичка компензација за случајот „Водството на ОНА“ да заврши во судските фиоки.

Процесуирањето на хашките случаи го наметна прашањето дали ќе биде ставена на тест коалицијата ВМРО-ДПМНЕ – ДУИ, затоа што од партијата на Ахмети лично се заинтересирани да не се отвораат овие случаи. Но, засега и ова добро им оди. На собраниската седница за симнувањето на имунитетот на двајцата пратеници на ДУИ, закажана во петок и тоа на полноќ, меѓу владејачките партии се' помина тивко и мирно. Пратениците на ДУИ молчеа. Единствено дискутираше опозицијата и, разбирливо, тројцата пратеници од Нова демократија на кои им е потребна политичка афирмација. Да биде трагедијата уште поголема, на дискусиите на овие пратеници кои бараа случаите да подлежат под Законот за амнестија се спротивставија токму пратениците од ДУИ. Побараа нивните сопартијци својата невиност и чесност да ја докажуваат пред судските органи.

И повторно следува прашањето: каков пазар ли се случи, па своите претходни жестоки залагања за хашките предмети да подлежат под амнестија ги заменија со молчење како риба. Велат дека немало ниту криза во партнерството со ВМРО-ДПМНЕ, а и Груевски потврдува дека владината коалиција функционира како никогаш досега. Груевски ги влече конците, а Ахмети како марионета неартикулирано игра на секој негов потег. Одлична коалиција, нема што!

Првите симптоми на чудното однесување на ДУИ се јавија уште летово со експресното гласање на законите, меѓу кои и Законот за јазиците и за Деловникот, акти кои претходно ги оспоруваше и бараше нови и повисоки решенија. Тогаш нејзини пратеници, кој со изјави за медиумите кој преку колумни, остро се спротивставија, но, за чудо, многу брзо беа замолчени од своите и се повлекоа, ги немаше никаде.

Но, нивното замолчување не значи и дека им го сменија и размислувањето и нивниот став. Дотаму не оди политичкиот пазар. Иако некако срамежливо и внимателно, сепак, во јавноста протекуваа шпекулации дека се незадоволни од коалиционите министри, дека не се согласуваат со измените на Изборниот закон во делот на квотите, затоа што го загрозува Бадентеровото мнозинство. Но, додека претходно и' забележуваа на ДПА дека не треба да излегува со барања за прашањата за Албанците, туку како дел од власта да ги спроведува, сега како да подзаборавија на ваквите забелешки.

ДУИ ќе мора во најскоро време да се оттргне од ваквата улога на владин статист ако не сака и отворено да биде обвинета дека сите оние заложби за унапредувања на правата на Албанците и жестоките наметнувања како нивни легитимен претставник биле само борба за неколку министерски и функционерски фотелји. Зашто на тој начин многу лесно ќе ја изгуби довербата од граѓаните што и' ја дадоа поддршката и на овие избори. Ќе остане без аргументи зошто би ја барала повторно поддршката на албанскиот електорат пред наредното изборно соочување со граѓаните.