Истекува мандатот на Ивановски

Уставен суд на Република Македонија ќе добие нов претседател на 1 ноември годинава, кога на актуелниот прв човек на Судот, Трендафил Ивановски, му завршува тригодишниот мандат.

Ивановски за судија на Уставен суд е избран на 7 мај 2003 година, а претседател на Судот е од 1 ноември 2007 година.

Претседателот на Уставен суд се избира од редот на судиите со тајно гласање на редовна седница. За претседател ќе биде избран кандидатот, кој на гласањето ќе добие двотретинско мнозинство.

Кандидати за претседател на Уставен суд можат да бидат судиите Вера Маркова, Бранко Наумоски, Игор Спировски, Зоран Сулејманов, Исмаил Дарлишта, Наташа Габер-Дамјановска и Гзиме Старова.

Судијата Лилјана Ингилизова-Ристова нема право да се кандидира за претседател на Судот, бидејќи ја извршуваше таа функција во период од 2003 до 2006 година. Мандатот на претседателот на Уставен суд е три години, без право на реизбор. (П.Р.)