Непрописно паркирани автомобили ги блокираат зелените пазари
На Зелено пазарче Пајак-службата дневно отстранува десетина возила
Стана практика тротоарите и влезовите пред зелените пазари да бидат блокирани од паркирани автомобили. Познато е дека на скопјани секогаш им недостасува паркинг-место, иако постојано има и такви кои не се ни трудат да го најдат, па ги оставаат своите автомобили каде што ќе стигнат, притоа узурпирајќи го пешачкиот простор.
Овие несовесни возачи прават сообраќаен прекршок - забрането паркирање на велосипедска патека, тротоар, односно на пешачка патека. Казната за овој вид прекршок изнесува 45 евра во денарска противвредност. Од СВР- Скопје велат дека полицијата редовно патролира и не само што ја регистрира оваа појава, туку и секојдневно ги казнува сопствениците на непрописно паркираните возила. Интервенира и Пајак- службата, но, и покрај се', ефектите не се такви какви што се очекуваа. Речиси секојдневно на сите зелени пазари во Скопје се изрекуваат по петнаесетина казни, а веќе наредниот ден повторно има паркирани автомобили и комбиња.
„На Зелено пазарче дневно, со помош на Пајак-службата се отстрануваат десетина возила, а се изрекуваат од 10 до 15 казни. И пред пазарот Буњаковец се креваат одо 10 до 15 автомобили, а полицијата изрекува по дваесетина казни. На најголемиот зелен пазар во градот, Бит- пазар, во текот на еден ден се подигаат од 15 до 20 возила, а се изрекуваат од 20 до 25 казни“, вели Лиза Бендевска, портпарол на СВР- Скопје.
Останува нејасно ако навистина толку се казнува, а казната и не е така мала, тогаш зошто толкава недисциплинираност на возачите?! (Сн.К.) |
