Ѕвездите на „Гранд“ ќе парадираат на Пинк15

Балканскиот медиумски тајкун, Жељко Мартиновиќ, очекува голем успех во Македонија

„Нема да бидеме српска телевизија во Македонија, туку македонска телевизија во Македонија. Најголем дел од програмата што ќе ја емитуваме ќе биде на македонски јазик, а останатото ќе биде титлувано или синхронизирано. Очекуваме да постигнеме голем успех и во Македонија, како што сме успешни и во другите земји во регионов каде што сме присутни“, изјави Жељко Мартиновиќ, сопственик на групацијата „Пинк медија“ и еден од најголемите медиумски тајкуни на Балканов.

Тој вчера и официјално соопшти дека во Македонија влегува преку К-15, а новата телевизија со новото име Пинк 15 од петок ќе започне да емитува своја програма. Договорот со К-15, конечно, е потпишан откако пропаднаа преговорите за купување на телевизија Алфа. Митровиќ иако тврди дека К-15 била телевизија без конкуренција, сепак, признава дека само пред една недела бил во сериозни преговори со сопственикот на Алфа, Штерјо Наков. „Не можам да кажам зошто пропаднаа преговорите за купување на Алфа, но точно е дека бевме многу блиску до договор. Можам да кажам и дека во ист период преговаравме со четири телевизии“, вели Митровиќ.

Прашан дали е точно дека откако пропаднале преговорите со Алфа, бил на разговори со првиот човек на ДБК, Митровиќ рече дека се само добри пријатели со Сашо Мијалков и дека имале една средба. Во првите два месеца од функционирањето на Пинк 15, Митровиќ најави дека ќе биде емитувана програма од продукцијата на „Пинк медија груп“, а потоа телевизијата ќе има и сопствена продукција. Главно, ќе бидат фокусирани на забавна програма, реални шоуа, потоа „Ѕвездите на ’Гранд продукција’“ и други популарни, но и информативни и документарни емисии. Митровиќ одби да ја обелодени сумата за која ја купил телевизија, но рече дека во првата година планира во неа да вложи од пет до осум милиони евра. (Св.У.)