Споменик за удавените туристи во Охрид

На крајот од септември ќе биде откриен споменик за 15-мина бугарски ��уристи, кои на 5 септември 2009 година се удавија во Охридското Езеро, пишува бугарскиот весник „Новините“. Според весникот, споменикот е иницијатива на ротари-клубовите во Охрид и во бугарскиот град Пирдоп, од каде што беа поголемиот број Бугари што се удавија откако туристичкиот брод „Илинден“ потона во езерото. Се очекува десетици Бугари да заминат за Охрид на 5 септември во знак на сеќавање на оние што ги загубија животите пред една година.

Според бугарскиот обвинител одговорен за истрагата за инцидентот со бродот „Илинден“, Божидар Џамбазов, македонската страна се' уште не и' ги доставила документите од обдукциите на удавените туристи на Бугарија. Тој објасни дека од македонските власти ги побарал не само протоколите за обдукција туку и документацијата за испитувањето на потонатиот брод и сведочењата на очевидците. Македонија исполнила само дел од барањата.

Обвинителот изјави дека ако бугарските власти ја добијат целата документација, ќе бидат во можност да поднесат обвинение против македонскиот капетан на бродот „Илинден“, Сотир Филевски.

Бугарската организаторка на ��обното патување на 50 туристи во Охрид пред една година, Борјана Георгиева, веќе е осудена за извршување бизнис-активности со кои не се почитува Законот за туризам. За неа е изречена парична казна од 4.500 лева и забрана за комерцијална активност во следните две години.

Македонските власти се' уште водат истрага за капетанот на бродот, 23-годишниот Сотир Филевски. Се верува дека тој го предизвикал потонувањето на бродот со тоа што дозволил да се качат 56 лица, иако бродот е регистриран за превоз на 43 патници, пишува „Новините“.