Дебрештани бараат турска паралелка

Нема часови се' додека некој не објасни кога ќе се оствари барањето

Моника Талеска

ПРИЛЕП - Жителите на долненското село Дебреште бараат во основното училиште „Вера Циривири-Трена“ да се отвори една паралелка на турски јазик во петто одделение, зашто, како што велат, нивните деца не знаат ниту една буква од македонската азбука. Тие тврдат дека пред три месеци доставиле барање во Министерството за образование и наука, но до вчера не добиле одговор. Со сомнеж дека нивното барање некој го ставил во фиока и сака да се манипулира со нивните деца, кои до четврто одделение учеле на турски јазик, тие категорични најавуваат бојкот на наставата.

„Се' додека не дојде некој да објасни кога и како ќе се оствари нашето барање, нема да ги пуштаме децата на настава. Тие не разбираат добро македонски јазик. Министерот Никола Тодоров треба да го реши овој проблем и да обезбеди наставен кадар за петто одделение“, изјави Сунел Дурмоски, претседател на Советот на родители. И Сонет Цанески и Исмија Дурмоски ги пренесоа истите ставови на жителите на Дебреште.

Директорката на училиштето, Ајше Муаремоска-Топалоска, исто така, тврди дека одговор од Министерството се' уште нема.

„Родителското барање е проследено до Министерството. Јас не сум надлежна да кажувам каков е законот по ова прашање. Единствено знам дека одговор од Министерството не сме добиле“, додава директорката Муаремоска-Топалоска.

Градоначалникот на Општина Долнени, Абдула Бајрамоски, и вчера не одговараше на телефонските повици, но од Министерството за образование и наука беа децидни. „Ако достават уште едно барање за финансирање на наставниот кадар, проблемот ќе биде решен затоа што не постои законска пречка за отворање паралелка на турски јазик“, објаснуваат од Министерството за образование и наука.