Во ЕУ се' подоцна во пензија

Европската комисија препорача продолжување на работниот стаж, како дел од решението за проблемот со се' повозрасното население и невработеноста, што ја потресе цела Европа. Сметајќи дека животниот век на Европејците до 2060 година ќе се продолжи за седум години, од Брисел се наметнува ставот дека работниот век, исто така, треба да биде продолжен за четири години и осум месеци. Тоа, на пример, во Германија би значело поместување на старосната граница за заминување во пензија од 65 на 70 години. Подолгиот работен стаж е и една од официјалните цели на економијата и социјалната стратегија на Европската унија до 2020 година. „Најмалку 75 отсто од населението во ЕУ на возраст меѓу 18 и 64 години би требало да бидат вработени“, изјави претседателот на ЕК, Жозе Мануел Барозо. Просечен граѓанин на ЕУ во пензија заминува кога ќе наполни 60 години, а тоа е значително порано отколку во многу земји во светот. (МИА)